इनरुवा । लागूऔषद मुद्दामा जिल्ला प्रहरी कार्यालय सुनसरीले निर्दोष व्यक्ति लाई पक्राउ गरी जेल चलान गरेको गुनासो प्राप्त भएको छ ।
भोक्राहा नरसिंह गाउँपालीका वडा नम्बर ८ बस्ने मुमताज अन्सारीलाई सुनसरी प्रहरीले लागूऔषध मुद्दामा पक्राउ गरी जेल चलान गरेकोमा उनी निर्दोष रहेको स्थानीय बताउछन् ।
निर्दोष व्यक्ति लाई गर्दै न गरेको कसुरमा फसाइएको गुनासो प्राप्त भएपछि सोमबार बिहान कोशी प्रदेश सभा सदस्य हाजी इस्राइल मन्सुरी र जिल्ला प्रहरी कार्यालय सुनसरीका डिएसपी एवं प्रवक्ता रामप्रसाद तिमिल्सिना लगायतको टोली निर्दोष व्यक्ति हो वा होइन भन्ने बारे मंगलवार अदालतमा गएर बुझिने समझदारी भएको बुझिएको छ । नेपाल प्रहरी कोहि कसैलाई गर्दै नगरेको कसुरमा फसाउने काम नगर्ने विश्वास दिलाउदै प्रवक्ता तिमिल्सिनाले आवश्यक अनुसन्धान गरी यथार्थ कुरा बुझ्ने सहमति भएको बताए ।
यता कोशी प्रदेश सभा सदस्य हाजी इस्राइल मन्सुरीले भुलवश सुनसरी प्रहरीले निर्दोष व्यक्ति लाई पक्राउ गरी जेल चलान गरेको पाइएमा तत्काल ति व्यक्ति लाई छाड्नुपर्ने माग गरेका छन् । यदि स्थानीयवासीले भने अनुसार मुमताज अन्सारी निर्दोष भएको पाइएमा उनलाई यथाशिघ्र छाड्न आवश्यक पहल गर्न सांसद मन्सुरीले ध्याणकर्षण गराएका छन् ।
