आसन्न प्रतिनिधिसभा सदस्य निर्वाचन नजिकिँदै गर्दा सुनसरी निर्वाचन क्षेत्र नं ४ मा उम्मेदवारहरू आफ्नो पक्षमा मतदाता आकर्षित गर्न घरदैलो अभियानमा व्यस्त छन् । उम्मेदवार र कार्यकर्ता आक्रामक रुपमा प्रचारमा खटिएका छन् । उनीहरु मतदातालाई चुनावको मुख्य एजेन्डा, प्रतिबद्धता, चुनावी घोषणापत्रमा उल्लेख गरिएका विषयबारे बुझाइरहेका छन् । तर अधिकांश मतदाता भने कसलाई मत दिने भनेर खुलिसकेका छैनन् । उनीहरु अनुभवी, विकासप्रेमी, राष्ट्रवादी, विश्वासयोग्य र अनुशासित उम्मेदवारलाई मतदान गर्ने प्रतिक्रिया दिँदै आएका छन् ।
नेपाली कांग्रेसका ज्ञानेन्द्रबहादुर कार्की, नेकपा एमालेका जगदिशप्रसाद कुशियैत, राष्ट्रीय स्वतन्त्र पार्टीका दीपककुमार साह बीच यसक्षेत्रमा त्रीपक्षीय प्रतिस्पर्धा देखिएको छ । यी दलका चुनावी घोषणापत्रमा शिक्षा, स्वास्थ्य, रोजगारी सुशासन, आर्थिक विकासका विषयलाई जोड दिइएको छ ।
घरदैलोमा समानुपातिक उम्मेदवार नगमा शाहिद
यसैबीच नेपाली कांग्रेस पार्टीबाट समानुपातिक उम्मेदवार बनेकी नगमा शाहिद यतिबेला मतदाताको घरदैलोमा व्यस्त छन् । आफ्नो निर्वाचन क्षेत्रको मतदाता समझ पुग्दै उनले नेपाली कांग्रेस पार्टी र रुख चुनाव चिन्हमा मतदान गर्न आग्रह गर्दै आएकी छन् । कांग्रेसकी उम्मेदवार शाहिदले कृषि उद्यमशीलताको विकास, भूमिहीन सुकुम्वासी समस्या समाधान, जलवायु परिवर्तन न्यूनीकरण, सामुदायिक जङ्गलको संरक्षणलगायत विकासको स्पष्ट खाका तयार पारेको बताउँदै त्यसलाई कार्यान्वयन गर्ने तथा मुलुकलाई आवश्यक कानुन बनाउन भूमिका निर्वाह गर्ने प्रतिबद्धता जनाइन । आफू निर्वाचित भएमा युवाहरूलाई प्रविधिसँग जोडेर स्थानीयस्तरमै नवप्रवर्तन र उद्यमशीलताका अवसरहरू सृजना गर्ने उनले प्रतिबद्धता जनाएका छन् । राजनीति विशुद्ध सामाजिक सेवा भएकाले सामाजिक न्याय, सामाजिक सशक्तीकरण, आर्थिक रुपान्तरण यस क्षेत्रप्रतिको आफ्नो दायित्व भएको समानुपातिक उम्मेदवार नगमा शाहिदको भनाइ छ । उनले भनिन्, “म यही क्षेत्रमा जन्मिएँ । यहीँको हावापानीमा हुर्किएँ । त्यसैले यसक्षेत्रका समस्या समाधान गर्न प्रतिबद्ध छु ।’
