सुनसरी निर्वाचन क्षेत्र नम्बर ४ बाट प्रतिनिधिसभा सदस्य पदको लागि तेस्रो पटक उम्मेदवारी दिएका पूर्व अर्थमन्त्री ज्ञानेन्द्रबहादुर कार्कीले आफूलाई मतदाताले निर्वाचित गराउने दाबी गरेका छन् । नेपाली कांग्रेस कोशी गाउँ कार्य समितीले सोमबार कोशी ३ स्थित जमुवा चौकमा आयोजना गरेको कार्यक्रममा बोल्दै उम्मेदवार कार्कीले २०७४ सालमा आफू पहिलोपटक निर्वाचित भएदेखि क्षेत्र न: ४ को मुहार फेरिएको हुनाले मतदाताले पुन: निर्वाचित गराउनेमा आफू ढुक्क भएको बताए । नेपाली कांग्रेस कोशी गाउँ कार्य समितीले आयोजना गरेको कार्यक्रम सभापति सुलेमान मन्सुरीको अध्यक्षता आयोजना गरिएको थियो भने कार्यक्रम नेपाली कांग्रेस सुनसरी निर्वाचन क्षेत्र नम्बर ४ का सभापति ऐयुब अन्सारी, समानुपातिक उम्मेदवार नगमा शाहिद, प्रचार प्रसार संयोजक मनोज साह, अनिता यादव, साह जमाल, जितेन्द्र खेरवार लगायत सयौं नेता कार्यकर्ताको उपस्थिति रहेको थियो । सुनसरी ४ कार्कीलाई जिताउन कांग्रेसी नेताकार्यकर्ता सक्रिय भएर लागेका छन् भने उनी प्रति आम मतदाताको समर्थन पनि बढ्दै गएको देखिएको छ ।
नेपाल विद्यार्थी संघको २०३९ सालमा सभापति भई नेपाली राजनीतिमा योगदान दिदै आएका कार्की तत्कालीन विद्रोही माओवादीसँग १२ बुँदे सहमति, शान्ति प्रक्रिया, संविधान निर्माण जस्ता महत्वपूर्ण काम गरेर देशलाई आवश्यक पर्दा भूमिका खेलेका व्यक्ति हुन । ‘मैले मुलुकमा राजनीतिक स्थिरता, संविधान निर्माणका साथसाथै सुनसरी क्षेत्र नम्बर ४ को मुहार फेर्न महत्त्वपूर्ण काम गरेको छु,’ उनले भने , ‘नीति निर्माण तहमा मात्रै होइन विकास र परिवर्तनका क्षेत्रमा धेरै काम गरेको छु । सोही कामका आधारमा मेरो जित सुनिश्चित छ ।’ गत भदौ २३ र २४ गते जेनजी आन्दोलन पछि उत्पन्न समस्या समाधान एवम् युवाहरुको मागलाई पूरा गर्न कांग्रेस बाहेक अर्को विकल्प नभएको कार्कीको भनाइ छ ।
गणतन्त्रले के दिन्छ/के दियो ? भन्ने खालको सोच नागरिकमा उत्पन्न हुनुमा वर्तमान संविधानको कार्यान्वयनका लागि सही र वास्तविक पहल हुन नसक्नु रहेको उनी बताउँछन् । ‘अब कानुन बनाएर जनताले संवैधानिक व्यवस्थाबाट हाम्रो आर्थिक, सामाजिक, सांस्कृति प्रगति भयो भन्ने बनाउनुछ,’ उनले भने, ‘त्यसका लागि पनि म यहाँबाट विजय भएर जानुपर्छ ।’ आसन्न चुनावमा संविधानको रक्षा, देशको विकास, जनताको आर्थिक प्रगति र समृद्धि मुख्य मुद्दा भएको उनले बताए । प्रतिनिधिसभा निर्वाचन २०७४ मा सुनसरी ४ बाट आफू निर्वाचित भएपछि सुनसरी क्षेत्र नम्बर ४ अन्तर्गतका विभिन्न सडक लगायतका भौतिक पूर्वाधारसँगै स्थानीय पूर्वाधार विकास साझेदारी कार्यक्रमबाट यस क्षेत्रको शिक्षा,स्वास्थ्य र खेलकुद पूर्वाधार निर्माणका साथै धार्मिक,सांस्कृतिक र अन्य भौतिक तथा पर्यटकीय पूर्वाधार तयार गर्न आफ्नो योगदान रहेकोे कार्की बताउँछन् ।
साथै लक्षित वर्गलाई सीप विकास तथा स्वरोजगार कार्यक्रम संचालन गर्न एवं सुनसरी क्षेत्र नम्बर ४ भित्रका स्थानीय तहसँग विकास निर्माणका लागि भूमिका खेल्दै आएको उनले बताए । आफ्नो आठ वर्षे कार्यकालमा गरेका कामको फेहरिस्त सुनाउँदै सुनसरी क्षेत्र नम्बर ४ को प्रतिनिधि सभाका उम्मेदवार कार्कीले चुनावी घरदैलो अभियानलाई तीव्र पारेका छन् । उनले गरेका आफ्ना कामका सूची बाँड्दै घरदैलो अभियानमा जुटेका छन् । सुनसरी क्षेत्र नम्बर ४ मा पर्ने कोसी गाउँपालीका,भोक्राहा नरसिंह गाउँपालिको सबै वडासहित हरिनगरको १, २, ४, ५, ६,७ इनरुवाको ३, ४ र ८ रामधुनीकाे १ वटा वडा बराहक्षेत्र ६, ७, ८, ९, १० र ११ वडा समेटिएको निर्वाचन क्षेत्रमा उनी २०७४ को निर्वाचनमा एमालेका प्रभावशाली नेता रमेश श्रेष्ठलाई हराउँदै निर्वाचित भएका थिए भने २०७९ सालमा नेकपा एमालेका नेता जगदीश कुसियैत लाई हराउँदै निर्वाचित भएका थिए । आफूले आफ्नो कार्यकालमा गरेको जनमुखी कार्य जित्ने आधार रहेको कार्कीको कथन छ । उनले सुकुम्वासीलाई आवसहितको पक्की घर, पुलसहित आफ्नो कार्यकालमा विभिन्न विकास निर्माणको काम सम्पन्न गरेको र केही सुरुवात गरेको तथा निर्माणाधीन अवस्थामा रहेको बताएका छन् । विकास प्रेमी नेतामा रूपमा चिनिने कार्की सबैसँग चाँडै घुलमिल हुनसक्ने उनको स्वभागका कारण मतदाताको रोजाइमा पर्ने गरेका छन् ।
