लौकही । नेपाली काङ्ग्रेसको १४ औं महाधिवेशन अन्तर्गत हुने निर्वाचनको लागि सुनसरी क्षेत्र नम्बर ४ का सभापति ऐयुब अन्सारी नेतृत्वको टीमले महाधिवेशन प्रतिनिधि महिला उम्मेदवारहरुको टुंगो लगाएको छ । ऐयुब अन्सारी नेतृत्वको टीमबाट सुनसरी क्षेत्र नम्बर ४ बाट महाधिवेशन प्रतिनिधि पदमा उम्मेदवारी दिने महिला उम्मेदवारको टुंगो लगाएको हो । ऐयुब नेतृत्वको टीमबाट महाधिवेशन प्रतिनिधि उम्मेदवार बन्ने सातजना महिला उम्मेदवारहरुमा अनितादेवी यादव, मुना रिजाल, अनु गुरुङ, शुशिला खनाल पौडेल, मिरा पोखरेल, फरिदा खातुन र राधिका कटुवाल रहेकी छिन् । उम्मेदवारहरुको टुंगो लागेसँगै प्रचारप्रसार अभियानलाई उनीहरूले तीव्रता दिएका छन् । सुनसरी जिल्लामा मंसिर ३ गतेदेखि हुन गइरहेको निर्वाचनको लागि उम्मेदवारीहरुले प्रचारप्रसार अभियानलाई तीव्रता दिएका हुन ।
सबै जातजाति र समुदाय र वर्गको प्रतिनिधित्व हुने गरी महिला उम्मेदवार छनोट गरिएको बताउदै सभापति ऐयुब अन्सारीले पुरुषतर्फ सम्भावित उम्मेदवार बन्ने व्यक्तिको संख्या आवश्यकता भन्दा बढी देखिएकाले उम्मेदवार छनोट गर्न केही समय लागेको बताए । आज वा भोलिसम्ममा थप १७ जना पुरुष उम्मेदवारहरुको समेत टुंगो लाग्ने उनको भनाइ छ । ऐयुब अन्सारीको नेतृत्वमा सुनसरी क्षेत्र नम्बर ४ बाट सम्भावित महाधिवेशन प्रतिनिधि उम्मेदवारका रूपमा गफार अन्सारी, सिकिमलाल यादव, डाक्टर प्रमोद खेरबार, सदानन्द मण्डल, शत्रुघन यादव, सुलेमान हाजी, अबुल हुसेन, भीम कटुवाल,रेवतीरवण दुलाल, भीमसिंह गुरुङ, मनिष चौधरी, शंकर बस्नेत, ओम कोइराला,हरिलाल मेहता, नन्द सिग्देल, बाबुराम विष्ट,मनोज साह,परमानन्द मेहता, जीवन विष्ट, सुरेन्द्र गुप्ता, राजु ढकाल, लक्ष्मी फुयाल, प्रकाश खड्का, सरजुग सरदार, बौवालाल मेहतालगायत देखिएका छन् । सुनसरी क्षेत्र नम्बर ४ बाट महाधिवेशन प्रतिनिधिमा जम्मा २४ जना निर्वाचित हुने भएकोले सातजना महिला उम्मेदवार टुंगो लगाएको ऐयुब नेतृत्वको टीमबाट थप १७ जना उम्मेदवार टुंगो लाग्न बाँकी छ ।
सुनसरी क्षेत्र नम्बर ४ नेपाली काङ्ग्रेसका वर्तमान सभापतिसँगै कोशी गाउँपालीकाका अध्यक्ष समेत रहेका ऐयुब अन्सारीविरुद्ध जमिल अख्तर आजादले क्षेत्रीय सभापतिका लागि प्रचारप्रसारलाई तीव्रता दिएका छन् । क्षेत्रीय सभापति निर्वाचित भएपछि नेपाली काङ्ग्रेस पार्टीलाई एकीकृत गर्दै पहिलोपटक संघीय संरचनामा सम्पन्न स्थानीय तहको निर्वाचनमा अधिकांश उम्मेदवारलाई जिताउन सफल भएका ऐयुब अत्याधिक मतले जित्ने सम्भावना प्रवल देखिएको नेपाली काङ्ग्रेस कोशी गाउँपालीकाका उपसभापति रघुनाथ देवको भनाइ छ । ´ऐयुब अन्सारीले पाएका अवसरलाई सदुपयोग गर्दै काङ्ग्रेस पार्टीलाई बलियो बनाउने काम गरेका छन् उनले भने त्यसैले क्षेत्र नम्बर ४ मा उहाँबाहेक अर्को कुनै विकल्प छैन ।` अर्को खेमाबाट ऐयुबविरुद्ध सभापति पदमा उम्मेदवारी दिएका जमिललाई नेपाली काङ्ग्रेस नेताकार्यकर्ताले पत्याउने कारण नदेखिएको कोशी गाउँपालीका नेपाली काङ्ग्रेसका सहसचिव जगदीश कामैतको दाबी छ । क्षेत्रीय सभापतिका लागि ऐयुब अन्सारीको नेतृत्वमा इनरुवा नगरपालिका ३ का रोशन खड्का र भोक्राहा नरसिंह गाउँपालीका ३ का जुगेश्वर यादव सचिव र जितेन्द्र यादव सहसचिव पदका उम्मेदवार देखिएका छन् भने अर्को खेमाबाट जमिल अख्तरको नेतृत्वमा सचिवमा इनरुवाका धीरज भट्टराई र पूर्णराज यादवले प्रचारप्रसार अभियानलाई तीव्रता दिएका छन् ।
