कोशी ब्यारेज । कोशी गाउँपालीकाका अध्यक्ष ऐयुब अन्सारीले वडा नम्बर ८ स्थित कोशी ब्यारेजमा निर्माण गरिएको धर्मशालाको उद्घाटन गरेका छन् । शुक्रबार दिउँसो आयोजित एक कार्यक्रमका बीच उक्त कार्यक्रमका प्रमुख अतिथि अध्यक्ष अन्सारीले सो धर्मशालाको उद्घाटन गरेका हुन । उक्त तीनकोठे धर्मशाला कोशी गाउँपालीकाको १० लाख सहयोगमा उपभोक्ता समिति मार्फत निर्माण गरिएको हो ।
सोही अवसरमा आफ्नो मन्तव्य राख्दै गाउँपालीकाका अध्यक्ष अन्सारीले निर्वाचित भएपछि आफू हरेक वर्ग र समुदायको भावना र मर्म बुझेर चौतर्फी विकास निर्माणकार्य गर्दै आएको बताए । पर्यटकीय स्थल समेत रहेको कोशी ब्यारेजमा बाहिरबाट आउने भक्तजनहरुलाई राति आराम गर्न समस्या भएको गुनासो आएपछि आफूले तत्कालै धर्मशाला निर्माण गर्न निर्देशन दिएको उनको भनाइ छ । आफ्नो कार्यकालमा हालसम्म कोशी गाउँपालीका क्षेत्रमा ४० वटा भन्दा बढी नयाँ मन्दिर निर्माणकार्य गर्न बजेट विनियोजन गरेको बताउने अध्यक्ष अन्सारीले कतिपय १९ वटा मन्दिरको निर्माणकार्य सकिएको र अन्य २१ वटा निर्माणाधीन अवस्थामा रहेको जानकारी गराए ।
जनताले आफूलाई विकास गर्नका निम्ति गाउँपालीका अध्यक्ष पदमा मतदान गरेकोले कुनै पक्षसँग विभेद नगरी हरेक क्षेत्र,वर्ग र जातजातिलाई समेटेर काम गरेको उनको भनाइ छ । कोशी ब्यारेजबासीले भोग्दै आएको बाढी समस्या अन्त्य गर्न भारतीय पक्षसँग सहकार्य गरेर दीर्घकालीन समस्या समाधानतिर आफू कटिबद्ध भएर लागेको अध्यक्ष अन्सारीको कथन छ । नेपाली काङ्ग्रेस भनेको कुरा कार्यान्वयन गर्ने पार्टी भएको तर्क गर्दै उनले आफू सोही पार्टीको सच्चा कार्यकर्ता भएकाले आफूले गरेको प्रतिबद्धताअनुसार जनभावनाअनुसार काम गरेको बताए ।
सोही कार्यक्रममा कोशी गाउँपालीकाकी उपाध्यक्ष अनिता यादव,वडा नम्बर ८ का वडाध्यक्ष विन्देश्वरप्रसाद यादव,नेपाली काङ्ग्रेस कोशी गाउँपालीका वडा नम्बर ८ का सभापति बलराम क्षेत्री, नेपाली काङ्ग्रेस कोशी गाउँपालीकाका उपसभापति रघुनाथ देव, सहसचिव जगदीश कामैत,क्षेत्रीय सदस्य उसमान मियाँ, कमरुद्दिन मियाँ, मन्जुर आलम, सुरज मण्डल,रामपृत मण्डल,कोशी गाउँपालीका प्राविधिक प्रमुख रोशन शर्मा,सामाजिक शाखा प्रमुख राजकिशोर मेहता,ओभरसियर मुन्ना ठाकुर,ताहिर मियाँ, ध्यानी मण्डललगायतको उपस्थिति रहेको थियो भने उक्त कार्यक्रम उपेन्द्र मण्डलले संचालन गरेका थिए ।
