लौकही । कुनैबेला कोसी क्षेत्रका विद्यार्थी उच्च शिक्षा पढ्न इनरुवा,इटहरी,धरान र विराटनगर जानुपर्ने बाध्यता रहेकोमा अब त्यो बाध्यता हटेको छ । कोसी गाउँपालीकाका निवर्तमान अध्यक्ष ऐयुब अन्सारीको प्रयासमा शैक्षिकसत्र २०७६ बाट शिक्षा बिज्ञान तथा प्रविधि मन्त्रालय मानव श्रोत विकास केन्द्रबाट प्राविधिकधारतर्फ पढाउने अनुमति पाएपछि कोशी गाउँपालीका ३ अवस्थित रहेको राष्ट्रिय मावि सोभनपुरमा अहिले प्लस टु का कक्षा संचालन भइरहेका छन् । जसका कारण गरिब तथा विपन्न वर्गका विद्यार्थीलाई बाहिर जानुपर्ने बाध्यता हटेको हो । कोशी गाउँपालीका एउटा पनि प्लस टु स्तरमा पठनपाठन नहुँदा यसक्षेत्रका सयौं विद्यार्थी अन्तै गएर पढ्न बाध्य थिए ।
राष्ट्रिय मावि सोभनपुरमा प्राविधिकधारतर्फ सिभिल इन्जिनियरिङ विषयको ९ कक्षाबाट कक्षा संचालन गरिएकोमा विगत एकवर्षयता कक्षा ११ को पठनपाठन सुरु गरिएको बिद्यालयका प्रधानाध्यापक हरेकृष्ण राउतले जानकारी दिए । उक्त बिद्यालयमा हाल व्यवस्थापन र शिक्षा संकाय लिएर कक्षा ११ पढ्ने ३६ जना विद्यार्थी छन् । घरछेउमै आफूले चाहेको विषय अध्ययन गर्न सकिने भएपछि यसक्षेत्रका विद्यार्थी उत्साहित छन् । इन्जिनियर बनेर आफ्नो गाउँको विकासमा सेवा गर्नु मेरो सानैदेखि सपना हो सिभिल धारतर्फ कक्षा १० मा अध्ययनरत कोशी गाउँपालीका ३ पश्चिम कुसाहाका साकिर मन्सुरीले भने जुन अब पूरा हुने भएको छ ।
गाउँमै प्राविधिक शिक्षासँगै व्यवस्थापन र शिक्षा संकाय अन्तर्गत कक्षा ११ पढाउन थालेपछि कोशी गाउँपालीका क्षेत्रका मात्रै नभइ गढी, भोक्राहा नरसिंह गाउँपालीकाका साथै बरहा नगरपालिकाबाट समेत उक्त विद्यालयमा अध्ययन गर्न विद्यार्थी आउने क्रम बढ्दो छ । कोशी गाउँपालीका क्षेत्रमा प्राविधिक विषय पढाउन थालेपछि विद्यार्थीका साथै अभिभावकलाई आर्थिक भार कम भएको छ । अनेकौं चुनौतीका बाबजुद प्राविधिक शिक्षासँगै गाउँमै उच्च शिक्षा अध्ययनअध्यापन गराउन सफल भएको कोशी गाउँपालीकाका निवर्तमान अध्यक्ष ऐयुब अन्सारी बताउँछन् । कोशी गाउँपालीका दलित र विपन्न समुदायको बसोबास भएको क्षेत्र हो उनले भने तिनीहरुले चाहेर पनि आर्थिक अवस्थाका कारण छोराछोरीलाई इन्जिनियर र ओभरसियर वा उच्च शिक्षा पढाउन सकेका थिएनन् । एउटा हुनेखानेका छोराछोरीले मात्र नभइ हुँदाखाने वा एउटा मुसहर समुदायका छोराछोरी पनि इन्जिनियर र ओभरसियर बनोस् उच्च शिक्षा हासिल गरोस् भन्ने उद्देश्यले उच्च शिक्षा पढाउन थालेका हौं उनले भने ।
सामुदायिक बिद्यालयका साथसाथै निजि बिद्यालयको शिक्षा क्षेत्रको गुणस्तर आफ्नो कार्यकालमा उल्लेखनीय सुधार गर्न सफल भएको अन्सारी बताउँछन् । आफू निर्वाचित भएपछि शिक्षाको विकासका लागि काम गर्ने प्रतिवद्धता अनुसार करारका शिक्षक नियुक्तीदेखी उच्च शिक्षा र प्राविधिक धार समेत संचालन गरेको उनको दाबी छ । उच्च शिक्षालाई सबैको पहुँचमा पुर्याउन सामुदायिक बिद्यालयमा विभिन्न विषयका पठनपाठन थालिएको छ भने गाउँमै पठनपाठन हुने भएपछि पछिल्लो समय प्राविधिक शिक्षामा विद्यार्थीको आकर्षण समेत बढेको पाइन्छ । कक्षा ११ मा अध्ययन गर्ने विद्यार्थीले छ सय पूर्णाङ्कको अध्ययन गर्ने छ त्यसमा नयाँ पाठ्यक्रमअनुुसार नेपाली, अङ्ग्रेजी र सामाजिक अध्ययन गरी तीन विषय अनिवार्य पढ्नुपर्ने पुस्तक वितरण गरिएको प्रअ राउतले जानकारी दिए । यस विद्यालयमा ऐच्छिक विषय छनोटका लागि विषयगत दुई समूह निर्माण गरिएको छ । विद्यार्थीले शिक्षा र व्यवस्थापन समूहमध्ये आफूले चाहेको विषय छनौट गर्नसक्ने उनको भनाइ छ । कोसीका जनताले विश्वास गरेर आफूलाई निर्वाचित गराएकोमा जनताको मर्म र भावनाअनुसार काम गर्न सफल भएकाले आगामी वैशाख ३० गते हुने निर्वाचनबाट कोसी जनताले आफूलाई पुनः निर्वाचित गराउनेमा अन्सारी ढुक्क छन् ।
