मिकाइल आलम
नेतृत्व रहरले होइन, जिम्मेवारीबोधले लिनुपर्छ अनि पद मानका लागि होइन, योगदानको लागि हुनुपर्छ भन्ने केदार भण्डारी २०१४ सालमा गाउँमा स्कुल (शारदा मावि) बनाउन जग्गा दिने पिता श्रीप्रसाद भण्डारीको लोकप्रिय सामाजिक छवि तथा सादगीपूर्ण जीवनशैलीबाट सानैदेखि प्रभावित थिए । त्यसैगरी, सुनसरीमा त्यो बेला प्रजातान्त्रिक आस्थाको दियो जोगाइराख्ने थोरै मान्छेमध्ये एक डाक्टर केशरी कोइरालाको राजनीतिक समर्पण नजिकबाट देखेका भण्डारी त्यसयता अहिलेसम्म पार्टीभित्र सादगी जीवनशैलीका पर्याय मानिन्छन् ।
लोकतन्त्रप्रतिको अटुट आस्था र सरल राजनीतिक जीवनशैली, कानुनशास्त्रमा स्नातक ५२ वर्षीय केदार भण्डारीको निरन्तर प्रतिबद्धता हो । नेपाली काङ्ग्रेसको प्रारम्भिक साङ्गठनिक नाम आखिल भारतीय नेपाली राष्ट्रिय काङ्ग्रेस थियो, जसका संस्थापक अध्यक्ष थिए सुब्बा देवीप्रसाद सापकोटा । उनै देवीप्रसाद सापकोटाको कर्मथलो सुनसरी जिल्ला आज पनि नेपाली काङ्ग्रेसको गढका रूपमा चिनिन्छ । जननेता बिपी कोइराला तथा नेपाली राजनीतिमा शान्ति तथा क्रान्तिनायक गिरिजाप्रसाद कोइरालाको राजनीतिक विरासत धान्ने थलो सुनसरीमा काङ्ग्रेस अघिल्लो स्थानीय तथा संसदीय निर्वाचनमा नेपाली काङ्ग्रेसले त्यसअघि जितेका थुप्रै ठाउँ गुमाउँदै गर्दा सुनसरी एकमात्र यस्तो जिल्ला थियो, जहाँ बहुमत र सानका साथ चारतारे झन्डा गाडिएको थियो । काङ्ग्रेसले आर्जन गरेको यो सफलताको श्रेय जान्छ, तत्कालीन सभापति राजीव कोइरालालाई, जसको दाहिने हात तथा थिङ्क ट्याङ्क मानिन्छन् केदार भण्डारी । उनै सफल जिल्ला सभापति राजीव कोइरालाको दुई कार्यकालमा जिल्ला सचिवको भूमिका निर्वाह गदै कुशल सङ्गठकका रूपमा परिचित भण्डारी भन्छन्– सुनसरीमा काङ्ग्रेसको जुन गढ बनेको छ, मैले यसलाई जगाइराख्ने आफ्नो मुख्य जिम्मेवारी सोचेको छु । म काङ्ग्रेसलाई एक इन्च पनि कमजोर हुन दिन्न ।
२०५४ सालमा नेपाल बार एसोसिएसन सुनसरीको अध्यक्ष, २०५६ मा प्रजातान्त्रिक कानुन–व्यवसायी सङ्घ (डिएलए)को केन्द्रीय उपाध्यक्ष, २०६० नेपाल बार एसोसिएसनको केन्द्रीय उपाध्यक्ष, २०६३ मा नेपाली काङ्ग्रेस सुन्सरीको जिल्ला सदस्य तथा २०६७ मा काङ्ग्रेसको निर्वाचित जिल्ला सचिव भई नेतृत्व क्षमता स्थापित गरेका भण्डारी नेपाली काङ्ग्रेसको १४ औं महाधिवेशनबाट सुनसरी जिल्ला सभापतिमा निर्वाचित भएका हुन । युवा जमातलाई मूलधारको राजनीतिमा ल्याउने र उचित जिम्मेवारीका साथ नेतृत्वमा पु¥याउने आफ्नो लक्ष्य रहेको उनको भनाइ छ । आगामी वैशाख ३० गते हुने स्थानीय तह निर्वाचनमा सुनसरी सदरमुकाम समेत रहेको इनरुवा नगरपालिकाको मेयर पदका उम्मेदवार बनेका भण्डारी आफूलाई जनताले ५ देखि ७ हजार मतअन्तरले जिताउने दाबी गर्छन् ।
इनरुवामा विपक्षी दलले जनतामाझ जातीय फन्डा झिकेर फाटो ल्याउन खोजेको भन्दै त्यस्ता भ्रममा नपर्न उनको आग्रह छ । नेपाल काङ्ग्रेस सुनसरीका सभापति तथा इनरुवा नगरपालिकाका मेयर पदका उम्मेदवारभण्डारीले विपक्षी दलले मुस्लिम समुदायमाथि निराधार हल्ला फिजाएर जातीय सदभाव खलल हुने किसिमका अभिव्यक्ति दिने गरेको प्रति सचेत हुन सबैमा आग्रह गरेका छन् । ‘विपक्षी दलहरूमा पराजित मानसिकता देखिन थालेपछि काङ्ग्रेस मुस्लिम समुदाय विरुद्ध छ भनेर अफवाह फैलाइएको रहेछ’ भण्डारीले भने, ‘यस्ता प्रोपोगण्डामा विश्वास नगरौँ ।’ आफू निर्वाचितमा इनरुवालाई कृषि नगरको रुपमा विकास गर्दा यहाँका कृषकहरूलाई १२ महिनै मल र बीउ उपलब्ध गराउने आफ्नो प्रमुख कार्य योजना रहेको भण्डारी बताउँछन् । साथै कृषकहरूलाई आवश्यक सिँचाइको समस्यालाई दीर्घकालीन रुपमा समाधान गर्ने आफ्नो योजना रहेको बताउँदै उनले ले इनरुवामा सुविधा सम्पन्न नगर अस्पताल र कलेज बनाउने समेत बताएका छन् ।
