भण्टाबारी । साझा सवालका लागि साझा मञ्च (कोकन) सुनसरीले मानव बेचबिखन रोकथामका लागि गाँउ बस्तीमा घरदैलो तथा छलफल कार्यक्रम संचालन गरेको छ । १६ औं राष्ट्रिय मानव बेचबिखन दिवसको अवसर पारेर कोकन सुनसरीले प्लान इन्टरनेशनल नेपालको सहयोगमा सीमावर्ती गाँउ बस्तीमा घरदैलो तथा छलफल कार्यक्रम संचालन गरेको हो ।”तिनै तहको सरकार,मानव बेचबिखन विरुद्धको सरोकार” भन्ने नाराका साथ यसवर्ष १६ औं राष्ट्रिय मानव बेचबिखन विरुद्धको दिवस सोमबार विभिन्न क्षेत्रका सरोकारवाला व्यक्ति र प्रहरीसंग समन्वय गरी मानव बेचबिखन तथा ओसारपसार विरुद्ध छलफल तथा सचेतनामुलक घरदैलो कार्यक्रम गरिएको हो। कोकन सुनसरीकी बालकुमारी विकका अनुसार भारतसंग सीमा जोडिएको कोसी गाउँपालीका वडा नम्बर ८ भण्टाबारी क्षेत्रमा मानव बेचबिखन सचेतना कार्यक्रम संचालन गरिएको बताइन् ।
कार्यक्रममा मानव बेचबिखन तथा ओसारपसारको वर्तमान अवस्था दलालहरुले अपनाउने नयां नयां तौरतरिकाहरु लगायत मानव बेचबिखन जस्तो जघन्य अपराधले समाजमा पारेको प्रभावका बारेमा गहन छलफल गरी अपराधिक गतिविधिमा संलग्न दलालहरुको जालो समाजको प्रत्येक क्षेत्रमा फैलिदै गएको हुदां उक्त मानवता विरोधी अपराध लगायत मानव बेचबिखन तथा ओसारपसारलाई न्युनिकरण तथा निर्मुलीकरण गर्न सम्पुर्ण सरोकारवालाहरुले आ–आफ्नो तर्फबाट सहयोग र समन्वय गरी हातेमालो गर्ने प्रतिबद्धता व्यक्त गरेका छन् । ईलाका प्रहरी कार्यालय भण्टाबारीका प्रमुख सई शेरबहादुर पराजुलीले प्रहरी प्रशासनले अपराध न्युनिकरणका लागि सदैव तत्पर रही कार्य गर्दै आएको बताए । मानव बेचबिखन तथा ओसारपसारमा संलग्न व्यक्तिलाई पहिचान गर्न थोरै कठिनाइ रहने भएपनि मानव बेचबिखन जस्तो जघन्य अपराध न्युनिकरणका लागि सदैव काम गर्दै आएको उनको भनाइ छ ।पछिल्लो समयमा भण्टाबारीमा कोसी गाउँपालीका,कोकन सुनसरी र नेपाल प्रहरीको साझेदारीमा आफ्नो सुचना तथा परामर्श केन्द्र स्थापना गरी काम गर्दै आएको हुँदा बेचबिखन तथा ओसारपसारका घट्नाहरु कम हुदैं गएको स्थानीय बिरेन्द्र कामैतले बताए ।
आगामि दिनमा पनि मानव बेचबिखनको क्षेत्रमा सक्रिय भएर काम गर्न अनुरोध गर्दै स्थानिय सरकारले गर्न सक्ने सहयोग पुर्णरुपमा गर्नुपर्नेमा उनले जोड दिए । नेपालमा अशिक्षा, खुला नाका, बेरोजगारीका कारण विभिन्न अपराधिक घट्नाहरु बढ्दै गएको अवस्थामा मानव बेचबिखन जस्तो जघन्य अपराध पनि बढ्दै गएको पाइन्छ । उक्त समस्यालाई कुनै एक व्यक्ति वा एकतह तप्काको समस्या हो भनेर नलिई सम्पुर्ण मानवको समस्या हो भनि प्रत्येक व्यक्तिले समाजलाई सचेत पार्न जिम्मेवारी लिनुपर्ने आवश्यकता देखिएको छ । कार्यक्रम अन्तर्गत कोसी गाउँपालीका वडा नम्बर ८ स्थित भण्टाबारीका क्षेत्रका ११० घरधुरीमा मानव बेचबिखन तथा ओसारपसार, घरेलु हिंसा, बाल विवाह लगायतको बारेमा घरघरमा गई स्थानियहरुलाई यस्ता अपराधिक क्रियाकलाप विरुद्ध सचेत पार्दै यस्ता घट्ना घटेको खण्डमा कोकन नेपाल वा प्रहरी प्रशासनलाई तुरुन्त खबर गर्नुपर्ने जस्ता कानुनी पाटो बारे जानकारी प्रदान गरी सचेतनामुलक पर्चा पम्पलेटहरु वितरण गर्दै जनचेतनामुलक घरदैलो कार्यक्रम सम्पन्न गरिएको भण्टाबारी सूचना केन्द्रका पहलाद आलमले जानकारी दिए ।
