जुगेस दास
देवानगञ्ज। देवानगञ्ज गाउँपालिकामा डिप्रेसनजस्तो गम्भीर मानसिक समस्याबारे जागरूकता फैलाउन विशेष कार्यक्रमको आयोजना गरिएको छ। तीन दिनसम्म चल्ने यस कार्यक्रमको पहिलो दिन आज बुधवार सफलतापूर्वक सम्पन्न भएको । कार्यक्रमको मुख्य उद्देश्य डिप्रेसनबारे जानकारी दिनु र यसबाट बच्नका उपायहरू समुदायमा पुर्याउनु हो।
कार्यक्रमका प्रमुख अतिथि देवानगञ्ज गाउँपालिकाका अध्यक्ष वेचन प्रसाद मेहता र विशिष्ट अतिथि वडा नं. ३ का वडा अध्यक्ष अनिल भगत रहेका थिए। कार्यक्रममा अध्यक्ष मेहताले आफ्नो मन्तव्य राख्दै डिप्रेसनको समस्या सामुदायिक सहयोग, समयमै उपचार, र मनोवैज्ञानिक परामर्शको माध्यमबाट समाधान गर्न सकिने कुरा उल्लेख गर्नुभयो।
कार्यक्रमका प्रमुख वक्ता वरिष्ठ मनोविज्ञ बिनोद पौडेलले मानसिक स्वास्थ्यका विविध पक्षहरूमा प्रकाश पार्नुका साथै डिप्रेसनबाट जोगिने व्यावहारिक उपायहरू प्रस्तुत गर्नुभयो। उहाँले डिप्रेसनलाई प्रारम्भिक रूपमा पहिचान गर्न र समाधान गर्न मानसिक स्वास्थ्यबारे सचेत रहनुपर्नेमा जोड दिनुभयो। कार्यक्रममा संस्था अध्यक्ष उमेश कुमार थापा र सचिव यसा गुरागाईंले पनि कार्यक्रमको उद्देश्य र महत्त्वबारे जानकारी गराउनुभयो।
कार्यक्रममा देवानगञ्ज गाउँपालिकाका विभिन्न वडाका ८२ जना महिला स्वास्थ्य स्वयंसेविकाहरू सहभागी भएका थिए। सहभागीहरूले डिप्रेसनसम्बन्धी ज्ञान र यसको समाधानबारे सिकेर आफ्नो समुदायमा अभियानलाई प्रभावकारी रूपमा फैलाउने प्रतिबद्धता व्यक्त गरे। कार्यक्रमको समन्वय मण्डुप्पा राईले गर्नुभएको थियो। उहाँले कार्यक्रमको तयारी र व्यवस्थापनमा महत्वपूर्ण भूमिका निर्वाह गर्नुभएको छ।
यो कार्यक्रमले समुदायमा डिप्रेसनजस्ता गम्भीर मानसिक स्वास्थ्य समस्याहरूलाई समयमै पहिचान र समाधान गर्न मद्दत पुर्याउने विश्वास गरिएको छ। सहभागीहरूले यो कार्यक्रम अत्यन्त उपयोगी भएको प्रतिक्रिया दिएका छन्। तीन दिने कार्यक्रमका बाँकी दुई दिनमा सहभागीहरूलाई थप ज्ञान प्रदान गर्न विभिन्न कार्यशाला, समूह अभ्यास, र परामर्शका सत्रहरू सञ्चालन गरिनेछ। कार्यक्रमले ग्रामीण क्षेत्रमा मानसिक स्वास्थ्यसम्बन्धी सकारात्मक सन्देश प्रवाह गर्दै समुदायमा गहिरो प्रभाव पार्ने अपेक्षा गरिएको छ।
