इनरुवा । सुनसरीको भोक्राहा नरसिंह गाउँपालीकामा आयोजित एक कार्यक्रमका बीच सयौं जना नेपाली कांग्रेसमा प्रवेश गरेका छन् । नेपाली कांग्रेस भोक्राहा नरसिंह गाउँपालीकाले शनिबार आयोजना गरेको पार्टी प्रवेश कार्यक्रममा नेकपा एमालेका महादेव मेहताको नेतृत्वमा एमाले,जसपा,माओवादी केन्द्र पार्टी परित्याग गरी दुईसय आठजना नेपाली कांग्रेसमा प्रवेश गरेको बताइएको छ ।
उनीहरूलाई नेपाली कांग्रेस सुनसरीका सभापति तथा इनरुवा नगरपालिकाका मेयर केदार भण्डारी,नेपाली कांग्रेस सुनसरी क्षेत्र नम्बर ४ का सभापति तथा कोसी गाउँपालीकाका अध्यक्ष ऐयुब अन्सारी,भोक्राहा नरसिंह गाउँपालीकाका अध्यक्ष अजमल अख्तर आजाद,नेपाल मुस्लिम संघ प्रदेश नम्बर १ का सभापति डाक्टर इस्राइल मन्सुरीलगायतले पार्टी प्रवेश गराएका हुन ।
सोही अवसरमा बोल्दै जिल्ला सभापति भण्डारीले सुनसरीमा नेपाली कांग्रेस बाहेक अर्को विकल्प नभएको बताए । यस्तै कार्यक्रमलाई सम्बोधन गर्दै क्षेत्रीय सभापति ऐयुब अन्सारीले नेपाली कांग्रेस जनताको सुखदुःख हरेक अवस्थामा साथमा दिने पार्टी भएकोले कांग्रेसप्रति क्रेज बढ्नु स्वभाविक भएको बताए । अघिल्लो चुनावको बेला कम्युनिस्टहरुले जनतालाई ठुला आश्वासन दिएर भोट प्राप्त गरेपनि यसपटक भने जनता जागरुक भइसकेको हुँदा त्यसो नहुने बताए । कम्युनिस्टको चरीत्र खराब भएको बारे जनता जानकार भइसकेको बताउदै उनले आगामी निर्वाचनबाट सुनसरी कांग्रेसमय हुने दाबी गरे ।
स्थानीय तह निर्वाचनमा कहिले नजित्ने बराहक्षेत्र नगरपालिकासहित भोक्राहा नरसिंह,हरिनगर जिताएर आफैंले नेतृत्व गरेको कोसी गाउँपालीका जित्न सफल भएका उनले आगामी निर्वाचनबाट क्षेत्र नम्बर ४ मा कम्युनिस्टको पत्तासाफ हुने बताए । कांग्रेस जनताको पार्टी भएको बताउने सभापति अन्सारीले आफूहरूले चुनावको बेला गरेको प्रतिबद्धता पूरा गर्न सफल भएकोले आगामी प्रतिनिधि र प्रदेशसभा निर्वाचनमा जित्न थप सहज हुने दाबी गरे ।
सोही कार्यक्रममा बोल्दै भोक्राहा नरसिंह गाउँपालीकाका अध्यक्ष अजमल अख्तर आजादले आफ्नो नेतृत्वमा कांग्रेसले जितेपछि भोक्राहा नरसिंह गाउँपालीकामा धमाधम विकास निर्माणकार्य सुरु भएको दाबी गरे । पाँच वर्षको अवधिमा भोक्राहा नरसिंह गाउँपालीकालाई नमूना गाउँपालीका बनाउने आफ्नो योजना रहेकोे उनको भनाइ छ । नेपाली कांग्रेस भोक्राहा नरसिंह गाउँपालीकाका सभापति युवराज दाहालको सभापतित्वमा सम्पन्न भएको पार्टी प्रवेश कार्यक्रममा नेपाली कांग्रेस सुनसरी क्षेत्र नम्बर ४ (ख) का सभापति भिखारी मण्डल,क्षेत्रीय सचिव जुगेश्वर यादव,भोक्राहा नरसिंह गाउँपालीकाकी उपाध्यक्ष सुनिताकुमारी उराँव,भोक्राहा नरसिंह गाउँपालीका वडा नम्बर ४ का अध्यक्ष हारुन अन्सारीलगायतको उपस्थिति रहेको थियो ।
