इनरुवा । आगामी मंसिर ४ गते हुने प्रतिनिधि सभा सदस्य निर्वाचनको लागि सुनसरी क्षेत्र नम्बर ४ मा नेपाली कांग्रेसका उम्मेदवार ज्ञानेन्द्रबहादुर कार्कीले मनोनयन दर्ता गराएका छन् । सुनसरी सदरमुकाम इनरुवा स्थित रहेको मुख्य निर्वाचन अधिकृतको कार्यालय शिक्षा तालिम केन्द्रमा सयौंको संख्यामा रहेका नेताकार्यकर्ताको उपस्थितिमा बाजागाजा सहित आइतबार सूचना,सञ्चार तथा प्रविधि मन्त्री समेत रहेका कार्कीले मनोनयन दर्ता गराएका हुन । उनी सुनसरी क्षेत्र नम्बर ४ बाट २०७४ सालको निर्वाचनमा विजयी भएका थिए ।
नेपाली कांग्रेस पार्टीका केन्द्रिय सदस्य तथा वर्तमान शेरबहादुर देउवा सरकारको प्रवक्ता समेत रहेका नेता कार्की सुनसरी क्षेत्र नम्बर ४ का आफ्ना नेताकार्यकर्ताका साथै आम मतदातामाझ निकै लोकप्रिय छवि बनाएका व्यक्ति हुन । उनको मनोनयन दर्ताको क्रममा इनरुवा र बराहक्षेत्र नगरपालिका, कोसी, हरिनगर र भोक्राहा नरसिंह गाउँपालीकालगायत जिल्लाका अन्य स्थानीय तहका जनप्रतिनिधिहरुका साथै कार्कीका सयौं शुभचिन्तकहरुको उपस्थिति रहेको थियो । यसैगरी सुनसरी क्षेत्र नम्बर ४ क मा नेपाली कांग्रेसका महाधिवेशन प्रतिनिधि सदानन्द मण्डल र ख बाट नेपाल मुस्लिम संघ प्रदेश नम्बर १ का सभापति हाजी डाक्टर इसराइल मन्सुरीले समेत प्रदेश सभा सदस्य पदको लागि मनोनयन दर्ता गराएका छन् ।
