लौकही । सुनसरी जिल्लाको प्रतिनिधित्व गर्दै प्रदेश नम्बर एककै उत्कृष्ट कबड्डी खेलाडी बन्न सफल भएकी जानकी उराँव र गंगा सरदारलाई कोसी गाउँपालीकाले सम्मान गरेको छ । कोसी गाउँपालीका वडा नम्बर ३ अवस्थित रहेको राष्ट्रिय मावि शोभनपुरकि छात्रा राष्ट्रिय कबड्डी खेलाडी जानकी उराँवलाई कोसी गाउँपालीकाका अध्यक्ष ऐयुब अन्सारीले सम्मानपत्रसहित नगद ११ हजारसहित पोखरामा हुन लागेको ९ औं राष्ट्रिय खेलकुद प्रतियोगिताको लागि बिदाइ समेत गरेका छन् । यस्तै सुनसरीको प्रतिनिधित्व गर्दै प्रदेशस्तरीय कबड्डी खेलमा उत्कृष्ट खेल प्रदर्शन गर्ने अर्की खेलाडी गंगा सरदारलाई पनि अध्यक्ष अन्सारीले सम्मानपत्र र नगद पाँचहजारसहित सम्मान गरेका छन् ।
उनीहरूले प्रतिनिधित्व गरेको सुनसरी जिल्लाले प्रदेशस्तरीय कबड्डीको स्वर्ण पद जितेको थियो । यस्तै उनीहरूलाई प्रशिक्षण गर्ने कबड्डी प्रशिक्षक तरुण यादव पनि सम्मानित भएका छन् । कोसी गाउँपालीका अध्यक्ष आदरणीय ऐयुब अन्सारीको प्रमुख आतिथ्यमा भएको सम्मान तथा बिदाई कार्यक्रममा उपाध्यक्ष अनिता यादव,सुनसरी क्षेत्र नम्बर ४ क बाट प्रदेशसभा सदस्य उम्मेदवार नेपाली काङ्ग्रेसका महाधिवेशन प्रतिनिधि सदानन्द मण्डल,वडा नम्बर ३ का वडा अध्यक्ष सुलेमान मन्सुरी,वडा नम्बर २ का वडा अध्यक्ष ध्यानी उराँव,राष्ट्रिय मावि शोभनपुरका प्रअ हरेकृष्ण राउत, स्वकीय सचिव धर्मेन्द्र विश्वासलगायतले खेलाडीहरुलाई सम्मानित गर्दै बिदाई गरेका थिए उक्त कार्यक्रम नायब सुब्बा राजकिशोर मेहताले संचालन गरेका थिए ।
कोसी गाउँपालीकाले आयोजना गर्दै आएको अध्यक्ष कप खेलकुद प्रतियोगिताको परिणामस्वरूप कोसी गाउँपालीकाबाट कबड्डी खेलको राष्ट्रिय खेलाडी उत्पादन गर्न सफल भएको अध्यक्ष अन्सारीको भनाइ छ । ´उत्कृष्ट चुनिएका खेलाडीमा गरिएको लगानी आज सार्थक साबित भएको छ खेलाडी सम्मान कार्यक्रमलाई सम्बोधन गर्दै उनले भने कोसी गाउँपालीकाले कबड्डी,भलिबललगायत सम्भावना बोकेका खेलका खेलाडीहरुलाई प्रशिक्षण दिदै आएको छ ।´ कबड्डी खेलमा सम्भावना बोकेकी जानकी र गंगा जस्ता खेलाडी एकीकृत गर्दै एकवर्षदेखि प्रशिक्षण दिदै आएको कोसी गाउँपालीकाकी उपाध्यक्ष अनिता यादव बताउँछिन् । जानकी र गंगाले महिला खेलाडीको प्रतिनिधित्व गरेको मात्रै नभई महिलाहरु हरेक क्षेत्रमा क्षमतावान रहेको कुरा प्रमाणित गरिदिएको उपाध्यक्ष यादवले बताइन् । खेलकुद पालीका वा जिल्लालाई मात्रै नभई राष्ट्रियलाई विश्वसामू चिनाउने भएकोले आफू निरन्तर खेल र खेलाडी विकासमा कटिबद्ध भएर लागेको अध्यक्ष ऐयुब अन्सारीले बताए ।
