इनरुवा । आगामी मंसिर ४ गते हुने प्रतिनिधिसभा सदस्य र प्रदेशसभा सदस्य निर्वाचनको लागि सुनसरीमा चहलपहल बढेको छ । निर्वाचनको मिति नजिकिएसँगै राजनीतिक दलहरुले चुनावी प्रचारप्रसार तीव्र बनाएका छन् । राजनीतिक दल तथा स्वतन्त्र उम्मेदवारहरुले मनोनयन दर्ता गराएपछि आफ्नो पक्षमा मत तान्न गाउँगाउँ पुगेका छन् । मतदाता रिझाउनका लागि दलका नेताहरु गाउँगाउँ पुग्ने होडबाजी चलेको छ । मुख्य प्रतिस्पर्धीका रुपमा रहेका कांग्रेस र एमालेले चुनावी अभियानलाई तीव्रता दिएका छन् । यसका साथै नेकपा माओवादी केन्द्र, नेकपा एकीकृत समाजवादी, जसपा नेपालले पनि आफ्नो वा गठबन्धनका उम्मेदवारहरुको पक्षमा चुनावी अभियान गरिरहेका छन् ।
नेपाली कांग्रेसका उम्मेदवारहरुले असोज २३ गते लोकतान्त्रिक बाम गठबन्धनको तर्फबाट मनोनयन दर्ता गराएपछि ‘घरघर जाऔँ, काङ्ग्रेस जिताऔँ’ अभियान थालेका छन् । नेपाली कांग्रेस सुनसरी क्षेत्र नम्बर ४ का सभापति ऐयुब अन्सारीले स्थानीय निर्वाचनमा जस्तै पार्टीलाई सुनसरी क्षेत्र नम्बर ४ को प्रतिनिधिसभा सदस्यमा ज्ञानेन्द्रबहादुर कार्की र प्रदेशसभातर्फ क मा सदानन्द मण्डल तथा ख मा हाजी इसराइल मन्सुरीलाई बहुमतका साथ विजयी गराउने अभियानमा जुटेको बताए । सुनसरी क्षेत्र नम्बर ४ मा कांग्रेस पार्टीका उम्मेदवारहरुलाई आगामी निर्वाचनबाट यसपटक पुनः निर्वाचित गराउन अभियान थालिएको सभापति अन्सारीको भनाइ छ । “निर्वाचनलाई मध्यनजर गर्दै हामीले अहिले हरेक वडा वडाबाट अभियान संचालन गरिरहेका छौँ । अभियानका दौरानमा पनि कांग्रेस पार्टीप्रति लोभलाग्दो आकर्षण छ । त्यसकारण आगामी निर्वाचनबाट प्रतिनिधिसभा र दुवै प्रदेशसभातर्फ जीत हासिल गर्छौं यसमा दुईमत छैन ” उनले दाबी गर्दै भने ।सङ्गठन विस्तार र सुदृढीकरणका लागि अभियान संचालन गरिएको र नेपाली कांग्रेस सिद्धान्त, नीति र विचारलाई आम मानिसमा पुर्याउनका लागि ´घरघर जाऔँ, काङ्ग्रेस जिताऔँ’ अभियानमा आफूहरू व्यस्त रहेको सभापति अन्सारीको भनाइ छ । गाउँगाउँमा सङ्गठन विस्तार गरेर चुनावी अभियानलाई तीव्रता दिएको बताउदै उनले भने “सुनसरी क्षेत्र नम्बर ४ सहित कांग्रेस नेतृत्वको बाम लोकतान्त्रिक गठबन्धनको पक्षमा सुनसरी जिल्लाको चार प्रतिनिधिसभा र अधिकांश प्रदेशसभाको नतिजा निर्वाचनबाट बहुमत ल्याउने लक्ष्यका साथ हामी अघि बढेका छौं, जनमत हाम्रो पक्षमा नै आउँछ ।”
सुनसरी क्षेत्र नम्बर ४ मा प्रतिनिधिसभा सदस्य पदको लागि नेपाली कांग्रेसका उम्मेदवार ज्ञानेन्द्रबहादुर कार्कीले मनोनयन दर्ता गराएका छन् भने अर्कोतर्फ नेकपा एमालेका नेता जगदीशप्रसाद कुशियैतले उम्मेदवारी दिएका हुन । वर्तमान शेरबहादुर देउवा सरकारमा सूचना,सञ्चार तथा प्रविधिसँगै कानुन,न्याय तथा संसदीय मामिला मन्त्री समेत रहेका ज्ञानेन्द्रबहादुर कार्कीले यसअघि सुनसरी क्षेत्र नम्बर ४ बाट २०७४ सालको निर्वाचनमा विजयी भएका व्यक्ति हुन ।नेपाली कांग्रेस पार्टीका केन्द्रिय सदस्य तथा वर्तमान देउवा सरकारको प्रवक्ता समेत हुन नेता कार्की । यसैगरी सुनसरी क्षेत्र नम्बर ४ क मा नेपाली कांग्रेसका महाधिवेशन प्रतिनिधि सदानन्द मण्डल र ख बाट नेपाल मुस्लिम संघ प्रदेश नम्बर १ का सभापति हाजी डाक्टर इसराइल मन्सुरीले समेत प्रदेश सभा सदस्य पदको लागि मनोनयन दर्ता गराएका छन् । यस्तै नेकपा एमालेको तर्फबाट कार्कीको विरुद्धमा उम्मेदवार दिएका कुशियैत सुनसरी क्षेत्र नम्बर ४ (क) बाट २०७४ सालको निर्वाचनमा विजयी भई तत्कालीन शेरधन राईको प्रदेश सरकारमा उद्योग,वन पर्यटन तथा वातावरण मन्त्री भएका थिए ।
यसैगरी सुनसरी क्षेत्र नम्बर ४ क तर्फबाट नेकपा एमालेको समर्थनमा जनता समाजवादी पार्टी नेपालका नेता पर्शुराम बस्नेतले उम्मेदवारी दिएका छन् भने ख मा केही समय अगाडि नेपाली कांग्रेस परित्याग गरी नेकपा एमाले प्रवेश गरेका अब्बास अन्सारीले उम्मेदवारी दर्ता गराएका छन् । सुनसरी क्षेत्र नम्बर ४ को प्रदेशसभा क तर्फ बाम लोकतान्त्रिक गठबन्धनका उम्मेदवार नेपाली कांग्रेसका नेता सदानन्द मण्डल र ख तर्फ हाजी डाक्टर इसराइल मन्सुरीले सुरु गरेको घरदैलो कार्यक्रममा उनीहरूलाई मतदाताले आफूहरू नेपाली कांग्रेस पार्टीका उम्मेदवारहरुलाई मतदान गर्न प्रतिक्षारत रहेको बताउने गरेको नेपाली कांग्रेस सुनसरी क्षेत्र नम्बर ४ ख का सचिव नईम अन्सारी बताउँछन् । २०७४ साल पश्चात् नेपाली कांग्रेसको नेतृत्वमा भएको आमूल विकास निर्माणकार्यबाट जनतामा आशा र भरोसाको सञ्चार उत्पदन भएको बताउदै सुनसरी क्षेत्र नम्बर ४ का निवर्तमान संघीय सांसद समेत रहेका ज्ञानेन्द्रबहादुर कार्कीले घरदैलोमा कांग्रेसप्रति जनलहर देखिएको बताए । सुनसरी क्षेत्र नम्बर ४ का मतदाता मात्रै नभई नेपाली जनताले विकास र समृद्धि चाहेको बताउदै उनले यसपटकको निर्वाचनमा कांग्रेस नेतृत्वको बाम लोकतान्त्रिक गठबन्धनले दुई तिहाई बहुमत ल्याउनेमा आफू विश्वस्त रहेको बताए ।
