इनरुवा । आगामी मंसीर ४ गते हुन गैरहेको प्रतिनिधीसभा र प्रदेशसभा निर्वाचनमा सुनसरी निर्वाचन क्षेत्र नम्बर ४ (क) बाट लोकतान्त्रिक गठबन्धनका तर्फबाट उम्मेदवारी दिएका सदानन्द मण्डल मतदाता माझमा लोकप्रिय बन्दै जानुभएको छ् । जनताका घरदैलोमा गएर भेटघाट गर्नुहुने उहाँलाई यतिबेला मतदाताहरुले जितको आशिर्वाद दिईरहेका छन । कुनै लाभको पदमा नरहेपनि सुनसरी क्षेत्र नम्बर ४ मा चौतर्फी विकास निर्माणकार्यले गति प्रदान गर्न मण्डलले अहम् भूमिका खेलेको भन्दै मतदाताहरुले आफ्ना आशा, अपेक्षा र हरेक समस्याको सामाधान उहाँको जितवाट सम्भव हुने बताउँछन् ।
सुनसरी क्षेत्र नम्बर ४ बाट पुनः उम्मेदवारी दिनुभएका कार्कीसँगै प्रदेशसभा क बाट उम्मेदवारी दिनुभएका सदानन्द मण्डल र ख बाट उम्मेदवारी दिनुभएका हाजी डाक्टर इसराइल मन्सुरीलाई मतदाता भन्छन्, “तपाईहरु जित्नु पर्छ, अनिमात्र यस क्षेत्रको विकास हुुन्छ र गाँउको मुहार फेरिन्छ । तपाईको जीत नै जनताको जित हो” । जनताका माझ घरदैलो कार्यक्रम गर्ने क्रममा कोसी गाउँपालीका क्षेत्रका स्थानीयले नेपाली कांग्रेसको नेतृत्वमा भएका विकास निर्माणकार्यबाट सन्तुष्ट रहेको बताउदै जनभावनाअनुसार विकास निर्माणकार्य गर्ने प्रतिनिधिसभातर्फ कार्की र प्रदेशसभा क मा मण्डल र प्रदेशसभा ख मा मन्सुरीलाई मतदान गर्न आफूहरू उत्साहित भएको स्थानीय बताउँछन् ।
नेपाली कांग्रेस सुनसरी क्षेत्र नम्बर ४ का सभापति ऐयुब अन्सारी र वर्तमान सूचना,सञ्चार प्रविधि मन्त्री कार्कीको विशेष पहल र हाम्रो साथ र समर्थनमा कोरोना महामारीका बाबजुद भएका विकास निर्माणकार्यका कारण आफूहरूको जीत सुनिश्चित भएको उम्मेदवार मण्डलले बताउनुभयो । जनता अब कसैको झुठो आश्वासनमा विश्वास नगर्ने र विकास र समृद्धि चाहेका कारण लोकतान्त्रिक वाम गठवन्धनलाई जिताउन सम्पूर्ण क्षेत्र लागिपरेको उहाँले दाबी गर्नुभयो । आफूहरूको जितले हरेक वर्ग,जातजाति,समुदायलाई समान हक र अधिकार सुनिश्चित गर्ने बताउँदै उहाँले यस क्षेत्रका बेरोजगार यूवाहरुलाई रोजगारको सृजना गर्ने बताउनुभयो । उहाँले यस क्षेत्रको हरेक अवस्था आफूलाई जानकारी रहेकोले योजनावद्ध रुपमा विकास गर्ने भनी प्रतिवद्धता गर्नुभयो ।उहाँले सुनसरीको क्षेत्र नम्बर ४ मा रिङ्ग रोडको निर्माण गर्ने, विदेशिएका यूवाहरुलाई आफ्नै ठाँउमा काम गर्ने वातावरण तयार गर्ने र समाज र देशको आर्थिक विकासमा योगदान दिन ठोस कार्यक्रमहरु ल्याउने प्रतिवद्धता जनाउनुभयो ।
लोकतान्त्रिक वाम गठबन्धनका तर्फबाट प्रतिनिधिसभातर्फ सुनसरी क्षेत्र नम्बर ४ का उम्मेदवार मन्त्री कार्कीले २०७४ सालको निर्वाचनका बेला जनतासामु आफूले गरेका प्रतिबद्धतामा ८० प्रतिशत पूरा गरेको बताउदै उम्मेदवार मण्डलले त्यो पनि आफूहरूको जितको आधार भएको बताउनुहुन्छ । गठबन्धनको सरकार निर्माण भएपछि मात्र प्रजातन्त्र र संविधानको रक्षा हुने उहाँको भनाइ छ । गठबन्धनको सरकारबाट मुलुक स्थिरता र समृद्धिको बाटोमा अगाडि बढ्ने मण्डलले बताउनुभयो । “विकास, जनताको आर्थिक समृद्धि, रोजगारी सृजनाको लागि लोकतान्त्रिक बाम गठबन्धनको विकल्प छैन । नेपाली काँग्रेसले घोषणा पत्रमै ३ वर्षसम्मका बालबालिकाहरूको उपचार सरकारले गर्ने भनेको छ। हाल ६८ वर्ष भए पछि पाउने सामाजिक सुरक्षा भत्तालाई ६५ वर्षमा झारेर ज्येष्ठ नागरिकहरूलाई भत्ता उपलब्ध गराउनेछ” उहाँले भन्नुभयो ।
