इनरुवा । निर्वाचनको मिति नजिकिँदै गर्दा सुनसरीमा चुनावी माहोल तात्तिँदै गएको छ । आगामी मंसिर ४ गतेहुने निर्वाचन आउन ८ दिन बाँकी हुँदा सुनसरीमा चुनावी माहोल तात्तिँदै गएको पाइन्छ । प्रतिनिधिसभा सदस्य र प्रदेशसभा सदस्य निर्वाचनका लागि सुनसरीका राजनीतिक दलहरूले प्रचारप्रसार अभियानलाई तीव्रता दिएका छन् । प्रत्यक्षतर्फ च प्रतिनिधिसभा सदस्यका लागि चारवटा र प्रदेशसभा सदस्यका लागि आठवटा निर्वाचन क्षेत्र रहेकोे सुनसरीमा यसपटक २०४ जना उम्मेदवारहरु चुनावी मैदानमा छन् । विभिन्न राजनीतिकाम दलका साथै स्वतन्त्र उम्मेदवारी दिएका उम्मेदवारहरुले घरदैलो अभियानलाई तीव्रता दिएको हुँदा सदरमुकाम इनरुवासहित गाउँदेखि शहर चुनावमय बनेको इनरुवा नगरपालिकाका राजेन्द्रप्रसाद भण्डारीले बताए । केही राजनीतिक दलहरूले आफ्ना चुनावी एजेन्डासहित भोट माग्न आउने गरेकोमा अधिकांश भने त्यतिकै मतदाता रिझाउदै गरेको उनलेे बताए ।
आम निर्वाचनको मिति नजिकिँदै गएपछि उम्मेदवारका साथै मतदान गर्ने मतदाताहरु पनि आफ्ना प्रतिनिधि छान्न उत्साहित देखिएको भोक्राहा नरसिंह गाउँपालीका वडा नम्बर ८ का हसबुल मियाँ बताउँछन् । यसपटकको निर्वाचनमा सत्ता गठबन्धनतर्फ नेपाली कांग्रेस,नेकपा माओवादी केन्द्र,नेकपा एस र जनमोर्चा पार्टी मिलेर चुनावी मैदानमा छन् भने अर्कोतर्फ उपेन्द्र यादव नेतृत्वको जनता समाजवादी पार्टी नेपाल,राष्ट्रिय प्रजातन्त्र पार्टी नेपालसहितका राजनीतिक दलसँग चुनावी तालमेल गरी नेकपा एमाले चुनावमा होमिएका छन् । दिनहुँजसो गाउँ गाउँमा उम्मेदवार,नेताकार्यकर्ता पुग्दा गाउँनै अहिले चुनावमय बनेको छ कोसी गाउँपालीका वडा नम्बर ५ का सराजुद्दिन आलमले भने । उनीहरू आ आफ्ना पार्टीका एजेन्डा,कार्ययोजना बोकेर मतदातासमक्ष भोट माग्न आउने गर्छन् । निर्वाचनपछि जनताका समस्या,गाउँका विकास निर्माण,सडक,खानेपानी,शिक्षा,स्वास्थ्य,कृषि,सिचाइ लगायतका समस्याको समाधान गर्नसक्ने सक्षम प्रतिनिधि छनोट गर्न मतदाता उत्साहित देखिएको आलमको कथन छ ।
निर्वाचनका लागि भोट माग्न गाउँ पुग्ने उम्मेदवार, नेता कार्यकर्तासमक्ष मतदाताले गाउँका विविध समस्यासँगै नागरिकताको मुद्दाबारेमा समेत जिज्ञासा् राख्ने गरेको सुनसरी क्षेत्र नम्बर ४ प्रदेशसभा क का उम्मेदवार सदानन्द मण्डलले बताए । सुनसरी क्षेत्र नम्बर ४ का जनता कांग्रेस मत हाल्न उत्साहित देखिएको उनले बताए । पहिला पहिलाको चुनावमा झुठा आश्वासन दिएर निर्वाचित हुने उम्मेदवारलाई नभई दिएको आश्वासन पूरा गर्ने उम्मेदवारलाई भोट हाल्ने पक्षमा आफू रहेकोे कोसी गाउँपालीका वडा नम्बर २ का ललित उराँव बताउँछन् । विगतका कयौं निर्वाचनमा आश्वासन दिएर मतदाता कन्भिन्स गराउने उम्मेदवारहरुलाई यसपटकको निर्वाचनमा जित्न मुश्किल हुने उनको भनाइ छ । हरेक निर्वाचनमा विभिन्न पार्टीका उम्मेदवारहरुले निर्वाचनको बखत घोषणापत्रमार्फत आश्वासन बाड्ने काम गर्छन् उराँवले भने तर यथार्थमा आमजनताका आधारभूत आवश्यकता समेत पूरा हुँदैन । त्यसैले विगतमा गरिएको आश्वासन पूरा नगर्ने उम्मेदवारहरुलाई जनता पत्याउने पक्षमा छैनन् । राजनीतिक दल तथा अन्य उम्मेदवारहरु नेताकार्यकर्ता,समर्थकसहित गाउँ गाउँमा चुनावी सभा गरी घरदैलोमा मतदाता रिझाउन व्यस्त देखिन्छन् ।
