भण्टाबारी । ७१ औं अन्तर्राष्ट्रिय भन्सार दिवसको अवसरमा सुनसरी भन्सार कार्यालयको आयोजनामा अन्तरक्रिया कार्यक्रम सम्पन्न भएको छ । सुनसरी भन्सार कार्यालयका निमित्त प्रमुख भन्सार अधिकृत गणपति कडेलको अध्यक्षता एवं आन्तरिक राजस्व कार्यालय इटहरीका प्रमुख कर अधिकृत अर्जुनकुमार न्यौपानेको प्रमुख आतिथ्यमा बिहीबार अन्तरक्रिया कार्यक्रम सम्पन्न भएको हो । ७१ औं अन्तर्राष्ट्रिय दिवसका अवसरमा भन्सार कार्यालय सहयोगी ज्ञानबहादुर कार्की र व्यापारीका भन्सार प्रतिनिधि महेश गुप्ता सम्मानित भएका छन् ।
खुला सीमानाका कारण हुँदै आएको चोरीपैठारी रोक्न थप कडाइ गरिनुपर्नेमा उक्त कार्यक्रमका सरोकारवालाहरुले बताएका छन् । सुनसरी भन्सार कार्यालय सेतुबन्ध कोशी ब्यारेज सुनसरीले आयोजना गरेको कार्यक्रममा बोल्ने वक्ताहरुले चोरीपैठारी रोक्न सीमामा तैनाथ सुरक्षाकर्मी र भन्सार प्रशासनले थप निगरानी बढाउनुपर्नेमा जोड दिए । खुला सीमाका कारण पूर्ण रूपमा तस्करी रोक्न सम्भव नभएपनि नियन्त्रण कार्यमा कटिबद्ध भएर लागेको प्रमुख भन्सार अधिकृत कडेलले जानकारी दिए । नेपाल भारतबीच रहेको खुला सीमाका कारण हुँदै आएको चोरीपैठारी नियन्त्रणमा भन्सारका कर्मचारीका साथै सुरक्षाकर्मी लागिपरेको बताउदै उनले चोरीपैठारी नियन्त्रणमा सबै तह र क्षेत्रबाट सहयोग आवश्यक रहेको बताए।
खुला सीमा नाकाका कारण हुँदै आएको राजस्व चुहावटमा उल्लेख्य सुधार आएकोले राजस्व संकलन बढेको सुनसरी भन्सार कार्यालयले जनाएको छ । सुनसरी भन्सार कार्यालय सेतुबन्ध कोसी ब्यारेजले चालू आर्थिक वर्षमा ८२ करोड ९३ लाख ३२ हजार राजस्व संकलन गर्ने लक्ष्य लिएकोमा श्रावणदेखि पुस मसान्तसम्म ६ महिनाको अवधिमा ४५ करोड ८८ लाख ९५ हजार राजस्व संकलन गरेको छ । जुन वार्षिक लक्ष्यको ५५ दशमलव ३३ प्रतिशत हो । सुनसरी भन्सार कार्यालयले चालु आर्थिक वर्षको पुस मसान्तसम्ममा ४३ करोड २० लाख २० हजार राजस्व संकलन गर्ने लक्ष्य राखेकोमा ६ महिनाको अवधिमा १०६ दशमलव २२ प्रतिशत अर्थात ४५ करोड ८८ लाख ९५ हजार राजस्व संकलन गर्न सफल भएको जनाएको छ ।
सुनसरीको नाकाहुँदै भारतीय बजारबाट आलु,प्याज,चामल,धान, भुस, गहुँलगायतका कृषिजन्य वस्तु बढी मात्रामा आयात भएको देखिन्छ । सुरक्षाकर्मी र सर्वसाधारण लगायतसँग सहकार्य गरेको हुँदा राजस्व चुहावट धेरैहदसम्म नियन्त्रण गर्न सफल भएकाले राजस्व असुलीमा वृद्धि भएको प्रमुख भन्सार अधिकृत कडेलले बताए । उक्त कार्यक्रममा कोसी गाउँपालीका वडा नम्बर ८ का अध्यक्ष बलराम क्षेत्री,सशस्त्र प्रहरी बल बिओपी भण्टाबारीका इन्स्पेक्टर मनोज खनाल,ईलाका प्रहरी कार्यालय भण्टाबारीका सई शेरबहादुर पराजुली,कोशी ब्यारेज प्रहरी प्रमुख, प्लान्ट क्वारेन्टाइन कार्यालय भण्टाबारीका प्रमुख हरि साह,पशु क्वारेन्टाइन कार्यालय भण्टाबारीका प्रमुख सरीलाल चौधरी, भन्सारका कर्मचारी,व्यवसायी, भन्सार एजेन्ट,संचारकर्मी लगायतको उपस्थिति रहेकोे थियो ।
