कोसी टप्पु । वन क्षेत्रका सिमसार नासिँदै गएकाले यसको संरक्षण गर्नुपर्नेमा सरोकारवालाले जोड दिएका छन्। विश्व सिमासार दिवसको अवसरमा कोसी टप्पु वन्यजन्तु आरक्षको कार्यालयले आजको आवश्यकता : सिमसारको पुनर्स्थापना भन्ने नाराका साथ बिहीबार आयोजना गरेको कार्यक्रममा बोल्ने वक्ताहरुले सो कुरा बताएका छन् । सिमसार संरक्षणमा अन्यौल देखिएका कारण यसको संरक्षण हुन नसकेको बताउदै उक्त कार्यक्रमका प्रमुख अतिथि कोसी गाउँपालीकाका अध्यक्ष ऐयुब अन्सारीले कोसी टप्पु वन्यजन्तु आरक्षको व्यवस्थापन गर्न प्रदेश र संघ सरकार उदासीन देखिएको बताए । यस्तै अन्योलका कारण सिमसार क्षेत्रको संरक्षण हुन नसकेको संरक्षण क्षेत्रका प्रमुख स्वीकार गर्छन्।
नदी तथा तलाउजन्य सिमसार क्षेत्रको विनाश नरोकिँदा कोसी टप्पु वन्यजन्तु आरक्षको अवस्था दयनीय बनेको छ। सिमसारले ओतप्रोत कोसीटप्पु वन्यजन्तु आरक्षमा पछिल्लो समय प्रदूषण र जलवायु परिवर्तनको तीव्र असर पर्दै गएको प्रमुख संरक्षण अधिकृत रमेशकुमार यादवले बताए। सो आरक्षको १७५ वर्गकिलोमिटर क्षेत्र नेपालको पहिलो सिमसार क्षेत्रका रूपमा रामसार सूचीमा सूचीकृत भएको थियो । जलवायु परिवर्तनका कारण सिमसार क्षेत्रमै पानीको अभाव भएको सरोकारवालाहरुले बताएका थिए । सुनसरी,सप्तरी र उदयपुर जिल्लाको १ सय ७५ किलोमीटर क्षेत्रफल भित्र अवस्थित रहेको कोशी टप्पु वन्यजन्तु आरक्ष भित्र समेत जनावरहरुले पिउने पानीको समस्या भएको स्थानीय बताउँछन् । जलवायु परिवर्तनका कारण सिमसार सुकेको बताउदै उनीहरूले जनावर लाई पिउने पानी अभाव हुँदा कोशी टप्पुले पोखरी खन्नु परेको बताउँछन् ।
कार्यक्रममा बोल्दै कोसी टप्पु वन्यजन्तु आरक्ष व्यवस्थापन उपभोक्ता समितिका अध्यक्ष राजकुमार सिंहले दिनप्रतिदिन सिमसार सुख्दै गएकोले प्रचारप्रसार गरेर सिमसार जोगाउन सबैमा आग्रह गरे ।सिमसार दिवसमा उल्लेखनीय सहभागिता नहुनु कमजोरी भएको स्विकार्दै सिंहले सबैले हातेमालो गरेर सिमसार संरक्षणमा लाग्न अपिल गरेका थिए । वर्षभरी कोठामा एउटा कार्यक्रम आयोजना गरेर सिमसार संरक्षण नहुने बताउदै कोशी गाउँपालीका अध्यक्ष ऐयुब अन्सारीले सिमसार जोगाउन व्यापक जनसहभागितामा कार्यक्रम आयोजना गरेर यसको महत्त्वको बारेमा जानकारी गराउनुपर्नेमा जोड दिए । मध्यवर्ती क्षेत्र व्यवस्थापन समितिका अध्यक्ष सिंहको अध्यक्षतामा सम्पन्न भएको कार्यक्रममा कोशी टप्पु वन्यजन्तु आरक्षका संरक्षण अधिकृत रमेशकुमार यादव,मेजर गिरिराज गौतम,बिरेन्द्र गौतम,कोसी र बराह नगरपालिकाका क्षेत्रका जनप्रतिनिधि, मध्यवर्ती क्षेत्र उपभोक्ता समितिका अध्यक्षहरु,समाजसेवी,बुद्धिजीवी लगायत संरक्षण कर्मीको उपस्थितिमा फेब्रुअरी २ मा आयोजित विश्व सिमसार दिवस कार्यक्रम सम्पन्न भएको थियो ।
