लौकही । सरुवा भई जान लागेका जिल्ला प्रहरी कार्यालय सुनसरीका एसपी र डिएसपीको बिदाई गरिएको छ ।सफलतापूर्वक आफ्नो कार्यकाल पूरा गरी सरुवा भई जान लागेका प्रहरी उपरीक्षक प्रभुप्रसाद ढकाल र प्रहरी नायब उपरीक्षक राजकुमार राईलाई एक कार्यक्रम आयोजना गरी कोसी मंगलबार गाउँपालीकाको कार्यालयले बिदाई गरेको हो ।
सुनसरी बसाई सफलतापूर्वक एवं उपलब्धिमूलक रूपमा पूरा गरेको भन्दै दुवैजनालाई हार्दिक बधाई तथा आगामी दिनमा थप सफलताको लागि शुभकामना सहित कदर पत्र दिएर कोसी गाउँपालीका अध्यक्ष ऐयुब अन्सारी,उपाध्यक्ष अनितादेवी यादव र प्रमुख प्रशासकीय अधिकृतरोहिनी आचार्य,विभिन्न वडाका वडा अध्यक्षहरु,कार्यपालीका सदस्यहरु,कर्मचारीहरुले बिदाई गरेका हुन ।
प्रहरी प्रधान कार्यालय काठमाडाैले जिल्ला प्रहरी कार्यालय सुनसरीका प्रहरी प्रमुख एसपी प्रभु प्रसाद ढकाललाई राष्ट्रिय प्रहरी प्रशिक्षण प्रतिष्ठान आधारभूत तालिम शाखा महाराजगन्ज पठाएको छ भने ढकालको स्थानमा बिपिन रेग्मी आउने भएका छन् । सुनसरी प्रहरी प्रमुख ढकालको नेतृत्वमा डिएसपी राजकुमार राई सुनसरीमा रहँदा लागु औषध दुर्व्यसन विरुद्धको अप्रेसन , सीमा क्षेत्रमा कडाइ , फरार अभियुक्तहरूको खोजी गरी पक्राउ अभियान , लगायत अपराध नियन्त्रणमा महत्त्वपूर्ण भूमिका निर्वाह गरेका थिए ।
