इनरुवा । नेपाल विद्युत प्राधिकरणले विद्युत महशुल बुझाउन सुनसरीका स्थानीय तहहरुलाई पत्राचार गरेको छ । गाविस पालाको समेत गरी अन्य बक्यौता विद्युत महशुल बुझाउन नेपाल विद्युत प्राधिकरणले जिल्लाका स्थानीय तहहरुलाई पत्राचार गरेको हो । यसैक्रममा कोशी गाउँपालीकालाई पत्राचार गर्दै नेपाल विद्युत प्राधिकरण इनरुवा वितरण केन्द्रले विद्युत महशुल बापत रु. ४५ लाख ८८ हजार ७७१ (थप दस्तुर सहित) बाँकी रकम देखिएको हुँदा उक्त बाँकी महशुल बुझाउनु हुन अनुरोध गरेको छ । बाँकी बक्यौता सम्बन्धी विस्तृत विवरण सहित पत्राचार गर्दै विद्युत प्राधिकरणले बाँकी महशुल नबुझाएको अवस्थामा भने महशुल संकलन विनियमावली २०७८ को उपविनियम १० अनुसारको प्रकृया अगाडी बढाइने जनाएको छ ।
यता कोशी गाउँपालीकाको कार्यालयले भने विगतका गाउँ विकास समितिको पालाको विद्युत महशुल तिर्न नसकिने जनाएको छ । देश संघीय प्रणालीमा गएपछि जिल्लाका साविकका चारवटा (हरिपुर,श्रीपुर, लौकही र पश्चिम कुसाहा ) गाउँ विकास समिति अर्थात गाविस गाभिएर कोशी गाउँपालीका बनेको भन्दै कोशी गाउँपालीकाको कार्यालयले त्यसकारण विगतका समयमा निर्वाचित भएका जनप्रतिनिधि (गाविस अध्यक्ष/प्रधानपञ्च ) वा कर्मचारीतन्त्रको पालामा विद्युत प्राधिकरणलाई तिर्नुपर्ने लाखौं विद्युत महशुल नतिरेपछि वर्तमान अवस्थामा तिर्न नसकिने स्पष्ट पारेको छ ।
विगतका चारवटा गाविसले मात्रै ४२ लाख ८४ हजार ३३५ रुपैयाँ बक्यौता रकम (२५% दस्तुर सहित ) तिर्न बाँकी रहेको नेपाल विद्युत प्राधिकरणले जनाएको छ । जसअनुसार तत्कालीन श्रीपुर गाविसले जम्मा बक्यौता रु ११ लाख ९१ हजार ९३ रुपैयाँ, तत्कालीन पश्चिम कुसाहा १७ लाख २७ हजार ८५ रुपैयाँ, लौकही गाविस सडक बत्ती१२ लाख ५६ हजार ६०४ रुपैयाँ र हरिपुर गाविस सडक बत्तीले १ लाख ९ हजार ८० रुपैयाँ गरी ४२ लाख ८४ हजार ३३५ रुपैयाँ बक्यौता रकम तिर्नुपर्ने देखिएको छ ।
कोशी गाउँपालीकाका कतिपय स्थानीयले भने नेपाल विद्युत प्राधिकरणले कहिले सडक बत्ती नै नपुगेको ठाउँको पनि सडक बत्ती बापत विद्युत महशुल बुझाउन भन्नु हास्यास्पद कुरा भएको बताउँछन् । यता अर्थ मन्त्रालय र उर्जा,जलस्रोत तथा सिचाइ मन्त्रालयबीच विभिन्न सरकारी निकायबाट विद्युत प्राधिकरणलाई भुक्तानी हुन बाँकी बक्यौता रकम प्राधिकरणले तत् तत् निकायबाट असुल गर्ने भनी सहमति भएको छ ।
