मिकाइल आलम
इनरुवा । सुनसरीबाट १ करोड ८२ लाख ५१ हजार नक्कली नोट सहित पक्राउ परेका भारतीय नागरिकलाई जिल्ला प्रहरी कार्यालयले सार्वजनिक गरेको छ । नेपाली १ हजार दरका नक्कली नोटहरु सहित इनरुवा नगरपालिका वडा नम्बर ४ स्थित रहेको सुनसरी खोलाको पुल नजिकबाट पक्राउ परेका भारतीय नागरिकलाई सोमबार सुनसरी प्रहरीले पत्रकार सम्मेलन गरी सार्वजनिक गरेको हो । आइतबार बिहान अन्दाजी १० बजेको समयमा पश्चिमबाट पूर्वतर्फ जादै गरेको BR 11 X 3429 नम्बरको भारतीय नम्बर प्लेटको सेतो स्कारपीयोलाई ट्राफिक प्रहरी सहितको संयुक्त टोलिले चेकजाँचको क्रममा ठुलो परिणाममा नेपाली नोट सहित भारत बिहार राज्य सुपौल जिल्ला थाना बीरपुर बस्ने अन्दाजी २२ वर्षका छोटु भन्ने महम्मद शैयद साफीलाई पक्राउ गरिएको सुनसरी प्रहरी प्रमुख एसपी बिपिन रेग्मीले जानकारी दिए ।
ट्राफिक सहितको संयुक्त टोलिले चेकजाँचको क्रममा शंका लागेर जिल्ला प्रहरी कार्यालय सुनसरी ल्याई चेकजाँच गर्दा हालसम्मकै ठुलो परिणाममा नक्कली नेपाली नोट बरामद भएको जनाइएको छ । पक्राउ परेकामाथि जिल्ला अदालतबाट म्याद थप भई थप अनुसन्धान भइरहेको सुनसरी प्रहरीले जनाएको छ ।स्कोरपियोको पछाडिको भागमा बोराभित्र झोलामा राखेर ल्याइएको अवस्थामा नक्कली नोट फेला परेको थियो । स्कोरपियोमै सवार रहेका अर्का व्यक्ति भने फरार भएको बताइएपनि यसबारे विभिन्न कोणबाट अनुसन्धान भइरहेकोे हुनाले तत्काल थप कुरा भन्न् नमिल्ने एसपी रेग्मीको भनाइ छ ।
कुन नाकाबाट ल्याइयो यत्ति ठुलो रकम ?
पत्रकार सम्मेलनमा सुनसरी प्रहरी प्रमुख एसपी रेग्मीले ठुलो परिणाममा नेपाली नक्कली नोट सहित भारतीय नम्बर प्लेटको स्कारपियो गाडीबाट भारतीय नागरिकलाई नियन्त्रणमा लिएको बताएपनि कहाँबाट यत्रो ठुलो परिणाममा नक्कली नोट ल्याइयो भन्ने बारे खुलाउन चाहेनन् । ति भारतीय नागरिकले योजनाबद्ध तरिकाबाट मधेस प्रदेशको सप्तरी जिल्लाको कुनौली नाका हुँदै नेपाल ल्याइएको हुनसक्ने श्रोतले बतायो । यद्यपि सुनसरी प्रहरीले दिएको जानकारीअनुसार नियन्त्रणमा लिइएको भारतीय गाडीको सुनसरी भन्सार कार्यालयबाट एकदिनको भन्सार फेला पर्नुले थप शंका उत्पदन गरेको देखिन्छ । सुनसरी जिल्लाको सीमासँग जोडिएको बीरपुरकै नागरिक पक्राउ पर्नु र बरामद गरिएको भारतीय नम्बर प्लेटको गाडीको सुनसरी भन्सार कार्यालयबाट एकदिनको भन्सार फेला पर्नुले कहिँ सुनसरीकै नाका भई भित्र्याइयो नक्कली नोट नेपालको पूर्वी बजारसम्म पुर्याउन खोजिएको हो कि ? भन्ने गम्भीर प्रश्न उब्जिएको छ ।
सुनसरी जिल्लाको भण्टाबारी नाकाबाट मात्रै सवारीसाधन आवतजावत हुँदै आएको अवस्था छ । भारतमा छपाई गरी विभिन्न सीमा नाका हुँदै सुनसरी जिल्लाको सीमावर्ती क्षेत्रमा स्टक गरेर एकैपटक ठुलो परिणाममा गन्तव्यसम्म पुर्याउन खोज्ने क्रममा चेकजाँचको क्रममा नक्कली नोट बरामद भएको हुनसक्ने बताइन्छ । यता एसपी रेग्मी भने अनुसन्धानबाट सबै कुरा खुल्ने बताउँछन् । घटनामा अन्य व्यक्ति पनि संलग्न हुन सक्ने भन्दै उनले सुनसरी प्रहरी मुख्य गिरोहलाई पक्राउ गर्ने हिसाबले अनुसन्धान गरिरहेकाले आवश्यकता अनुसार सबै कुरा स्पष्ट हुने बताए ।
