कोशी । विभिन्न स्थानमा आगलागीबाट पीडित भएका घरपरिवारलाई खाद्यान्न सामाग्री वितरण गरिएको छ । यसै क्रममा सुनसरी कोशी गाउँपालीका वडा नम्बर ३ स्थित गोइठी टोलमा गएको शुक्रवार राती आगलागी हुँदा ११ ओटा घर जलेर नष्ट भएकोमा कोशी गाउँपालीका अध्यक्ष ऐयुब अन्सारीको विशेष पहलमा कतार च्यारिटीको आर्थिक सहयोगमा सामाजिक जीवन केन्द्र नेपालले उपलब्ध गराएको राहत सामाग्री शुक्रबार वितरण गरिएको हो । अग्नि पीडित १०३ जना र १४७ जना विपन्न तथा एकल महिला गरी २५० जनालाई खाद्यान्न सामाग्री वितरण गरिएको हो ।
सुनसरी र सप्तरी समेत गरी १०३ जना अग्नि पीडितलाई खाद्यान्न सामाग्री वितरण गरिएको सामाजिक जीवन केन्द्र नेपालका सचिव दिनेश साहले जानकारी दिनुभयो । यसैगरी कोशी अध्यक्ष ऐयुब अन्सारी,कतार च्यारिटीका प्रतिनिधि अबु मुजाहिद अन्सारी , प्रमुख प्रशासकीय अधिकृत,विभिन्न वडाका वडा अध्यक्षहरु लगायतको उपस्थितिमा १४७ जना विपन्न तथा एकल महिलालाई पनि खाद्यान्न सामाग्री वितरण गरिएको सामाजिक जीवन केन्द्र नेपालका अताउल्लाह खानले जानकारी दिनुभयो ।
आगलागी प्रतिकार्य कार्यक्रम अन्तर्गत उपलब्ध गराइएको खाद्यान्न सामाग्री कोशी गाउँपालीका अध्यक्ष ऐयुब अन्सारी,सामाजिक जीवन केन्द्र नेपालका अध्यक्ष हजरत मन्सुरी लगायतले वितरण गर्नुभयो । खाद्यान्न सामाग्री वितरण कार्यक्रम आयोजना गरी आगलागी पीडित परिवारलाई २५ केजी चामल ,५ लिटर खाना पकाउने तेल,चना ३ केजी ,२ केजी चिनी ,१ केजी नुन र पिठो (आटा) ५ केजी वितरण गरिएको सामाजिक जीवन केन्द्र नेपालका अध्यक्ष हजरत मन्सुरीले जानकारी दिनुभयो ।
पीडित परिवारलाई आवश्यकता अनुसार कोशी गाउँपालीकाका साथै जिल्ला प्रशासन कार्यालय सुनसरी,नेपाल रेडक्रस लगायतबाट खाद्यान्न तथा अन्य सामाग्री सहयोग उपलब्ध गराएकोमा मेरो आग्रहलाई स्वीकार गर्दै कतार च्यारिटीको आर्थिक सहयोगमा सामाजिक जीवन केन्द्र नेपालले उपलब्ध गराएकोमा अध्यक्ष अन्सारीले खुशी व्यक्त गर्नुभयो ।
कोशी गाउँपालीका वडा नम्बर ३ स्थित गोइठी टोलमा स्थानीय इसराइल मियाँको घरबाट विद्युत सर्ट भई आगलागी हुँदा ११ वटा घर,३८ वटा बाख्रा र ४ वटा चौपाया जलेर नष्ट भएको थियो ।
