मिकाइल आलम
कोशी ।सुनसरी जिल्लाको कोशी गाउँपालिका वडा नम्बर ३ स्थित रहेको राष्ट्रीय मावि शोभनपुरमा लागूऔषध विरुद्धको सचेतनामूलक कार्यक्रम सम्पन्न भएको छ । FAN जिल्ला कार्य संचालन समितिका संयोजक तथा जिल्ला प्रहरी कार्यालय सुनसरीका प्रवक्ता डिएसपी नवीन कृष्ण भण्डारीको अध्यक्षता एवं कोशी गाउँपालिका अध्यक्ष ऐयुब अन्सारीको प्रमुख आतिथ्यमा बुधवार FAN लोगो अंकित T-shirt वितरण एवं प्रशिक्षण कार्यक्रम सम्पन्न भएको हो । “लागूऔषध दुरुपयोग विरुद्धको ऐक्यबद्धता व्यक्ति , समाज र राष्ट्रको प्रतिबद्धता ” भन्ने नाराका साथ सो कार्यक्रम आयोजना गरिएको हो ।
लागूऔषध सेवन तथा दुव्र्यसनमा सबैभन्दा बढी १६ देखि ३० वर्ष उमेर समूहका व्यक्तिहरू संलग्न रहेको बताउदै कोशी अध्यक्ष ऐयुब अन्सारीले यस्ता अभियान प्रभावकारी बनाउदै युवा पीढीलाई गलत लत बाट बचाउन प्रहरीसंग सहकार्य गरी निरन्तर लागिपरेको बताए ।
विशेषगरी विद्यालय तथा कलेजमा अध्यनरत युवाहरू गलत साथीभाइको सङ्गत, पारिवारिक समस्यामा परेका व्यक्तिहरू लागूऔषधको दुरुपयोग र दुव्र्यसनमा संलग्न भएको हुदाँ यसतर्फ सबैजना लाई समयमै सचेत गराउन कार्यक्रम आयोजना गरिएको उनको भनाई छ ।
खासगरी सुनसरीको सीमावर्ती क्षेत्रहरूमा लागूऔषधको कारोबार बढेको पाइन्छ । सीमावर्ती क्षेत्र लौकही, भण्टाबारी, घुस्की, कप्तानगञ्ज, लाही, श्रीपुर सहितका नाका प्रयोग गरी दिनहुँ दर्जनौं नेपाली युवाहरू भारतीय बजारहरूमा गएर लागूऔषधको सेवन गर्ने र लागूऔषधको कारोबार गर्ने गरेका छन् ।
खुला सीमा हुनाले लागूऔषध कारोबारी तथा सेवनकर्ताको सङ्ख्या बढेकाले भारतीय सीमा सुरक्षा बल एसएसबीले समेत चेकजाँचमा थप कडाइ गरेको छ । नेपाली युवाहरू भारतको भीमनगर, वीरपुर, फुल्काहालगायतका बजारमा गएर दिनहुँ लागूऔषध सेवन गर्ने र चेकजाँचमा पक्राउ पर्नेहरूलाई एसएसबीले नियन्त्रणमा लिई घण्टौंपछि मात्र छाड्ने गरेको छ ।
सीमावर्ती क्षेत्रहरूमा पछिल्लो समयमा प्रहरीले चेकजाँचमा कडाइ गरेपछि भने खुल्ला सीमाको फाइदा उठाएर लागूऔषध गाँजाको कारोबारीहरू धमाधम पक्राउ पर्न थालेको डिएसपी भण्डारी बताउँछन् । कारोबार रोक्न सक्रियताका साथ लागेकाले पछिल्लो समय लागूऔषध, हातहतियार, चोरीपैठारी, राजस्व छलीजस्ता गैरकानूनी कारोबार नियन्त्रणउन्मुख अवस्थामा रहेको उनले दाबी गरे ।
बढ्दो लागूऔषधको ओसार–पसार, बिक्री वितरण तथा सेवनमा संलग्नलाई शून्य सहनशीलताको नीति अवलम्बन गरिएको बताउँदै डिएसपी भण्डारीले पक्राउ परेकालाई प्रचलित कानूनबमोजिम कारबाही गरी बढ्दो लागूऔषध दुव्र्यसन न्यूनीकरणका साथै प्रयोगकर्तालाई थप जोखिममा पर्न नदिई उनीहरूलाई समाजमा पुनस्र्थापना गराउन अभिभावकहरूलाई थप जिम्मेवार बन्न सचेत गराइएको बताए ।
समाजमा शान्ति सुव्यवस्था कायम राख्ने उद्देश्यले सुनसरी जिल्ला अन्तर्गतका लागूऔषध सेवन तथा कारोबार हुने मुख्य–मुख्य स्थानहरूमा विशेष सुरक्षा योजना बनाई मातहतका सम्पूर्ण प्रहरी इकाइहरूमा विशेष प्रहरी टोली परिचालन गरिएको जिल्ला जिल्ला प्रहरी कार्यालयले सुनसरी जनाएको छ ।
