मिकाइल आलम
भण्टाबारी । वर्षातको मौसममा बाढी र डुवानको सम्भावित् क्षति न्यूनीकरणको लागि सुनसरीमा पूर्वतयारी थालिएको छ । वर्षातको समयमा आउन सक्ने बाढी तथा डुवानबाट जनधनको सम्भावित् क्षति रोक्न जिल्ला विपद् व्यवस्थापन समितिले योजना तयार पारेको हो ।
सुनसरीका प्रमुख जिल्ला अधिकारी उमेशकुमार ढकाल नेतृत्वमा जिल्ला सुरक्षा निकायका प्रमुखहरुले मंगलबार सम्भावित बाढी र डुवानको क्षेत्रका रूपमा हेरिएको सप्तकोशी क्षेत्रको अनुगमन गरेका छन् ।
बाढी र डुवानको कारण सम्भावित् विपद् व्यवस्थापनमा रोकथाम तथा प्रतिकार्यका हालसम्म भएका कामको समीक्षा गर्दै पूर्व तयारीमा जुटेको प्रमुख जिल्ला अधिकारी ढकालको भनाइ छ । जिल्लाका सुरक्षा निकायका साथै स्थानीय तहका जनप्रतिनिधिहरुसँग समन्वय गर्दै विगतका घटनाबाट पाठ सिक्दै स्थानीय तहमा बाढी र डुवानको जोखिममा रहेका स्थान, त्यहाँ बसोबास गर्ने जनसंख्या र घरधुरी यकिन गरी त्यस्ता स्थानमा मनसुन पूर्व तयारी योजना कार्यान्वयनमा लागिपरेको उनको कथन छ ।
यस्ता योजनामा स्थानीय तह, जिल्ला विपद् व्यवस्थापन समिति, प्रदेश र संघीय सरकारबाट गर्नुपर्ने काम पनि उल्लेख गरिएको हुन्छ । राहत तथा उद्दारका काममा सहयोग लिन सकिने सरकारी, गैरसरकारी तथा निजी क्षेत्रको स्रोत साधनको लगत संकलन र आँकलनको काम अघि बढाइने भएको छ ।
स्थानीय तहमा विपद् सम्पर्क स्थान वा स्थानीय आपतकालीन कार्य सञ्चालन केन्द्र र सम्पर्क व्यक्ति तोक्ने योजना समितिको छ । मंगलबार कोशी क्षेत्रको प्रजिअ ढकालसँगै जिल्ला प्रहरी कार्यालय सुनसरीका प्रमुख एसपी कमल थापा,सशस्त्र प्रहरीका प्रमुख एसपी माधवप्रसाद पौडेललगायतले सम्भावित बाढी र डुवानमा पर्ने क्षेत्रहरूको अवलोकन गर्दै कोशी प्रोजेक्टका ठेकेदारसँग समेत छलफल गरेका थिए ।
