जुगेश दास
लौकही । साउदी अरबबाट उमराह सम्पन्न गरी स्वदेश फर्किनुभएका कोशी गाउँपालिकाका अध्यक्ष ऐयुब अन्सारीलाई आइतवार गाउँपालिकाको कार्यालयमा भव्य स्वागत गरिएको छ।
गाउँपालिकाको उपाध्यक्ष अनिता यादवको नेतृत्वमा प्रमुख प्रशासकीय अधिकृत दामोदर दाहाल, लेखा अधिकृत सुरप्रसाद दंगाल सहितका कर्मचारीहरूले अध्यक्ष अन्सारीलाई फूलमाला अर्पण गर्दै कार्यालयमा स्वागत गरे। दुई साताको अनुपस्थितिपछि गाउँपालिकामा उपस्थित भएका अध्यक्ष अन्सारीको आगमनले कर्मचारीहरू र स्थानिय जनप्रतिनिधिमा उत्साह थपिएको देखिन्थ्यो।
स्वागत कार्यक्रममा उपाध्यक्ष यादवले अध्यक्ष अन्सारीलाई शुभकामना व्यक्त गर्दै उमराहपछि पुनः गाउँपालिकाको कार्यमा उहाँको नेतृत्वले नयाँ ऊर्जा र प्रेरणा दिने विश्वास व्यक्त गरिन्।
अध्यक्ष अन्सारीले स्वागतप्रति आभार प्रकट गर्दै गाउँपालिकाको समग्र विकास र सेवाप्रवाहलाई अझ प्रभावकारी बनाउने बताए । उमराहले आफूलाई आध्यात्मिक र मानसिक रूपमा बलियो बनाएको र यो अनुभव गाउँपालिकाको सेवामा समर्पित हुने क्रममा मार्गदर्शक हुने उनले बताए। स्वागत कार्यक्रममा कर्मचारी र जनप्रतिनिधिहरूबीच गाउँपालिकाको विकासका विषयमा छलफलसमेत भएको थियो। अध्यक्ष अन्सारीको आगमनसँगै कोशी गाउँपालिकाका विकास योजनाहरूमा गति थपिने अपेक्षा गरिएको छ।
