कोशी प्रदेश सरकारले अयोध्याबाट आएका भारतीय अतिथिहरूलाई कोशी प्रदेश पर्यटन वर्ष २०८२ मा भ्रमण गर्न औपचारिक निमन्त्रणा प्रदान गरेको छ । मधेश प्रदेशका मुख्यमन्त्री सतीश सिंहको अध्यक्षतामा आयोजित भव्य समारोहमा विभिन्न महत्त्वपूर्ण व्यक्तित्वहरूको उपस्थितिमा यो कार्यक्रम सम्पन्न भयो ।
कोशी प्रदेशका पर्यटन, वन तथा वातावरण मन्त्री सदानन्द मण्डलले अयोध्याका प्रतिनिधि मण्डललाई स्वागत गर्दै कोशी प्रदेशको पर्यटकीय सम्भावनाहरू र विशेष गरी रामधुनीको धार्मिक महत्त्वका बारेमा विस्तृत जानकारी प्रदान गरे। कार्यक्रममा श्रीराम जन्मभूमि तीर्थक्षेत्रका प्रमुख अधिकारीहरू सहित विभिन्न भारतीय प्रतिनिधिहरू सहभागी थिए ।
पिण्डेश्वर विद्यापीठका संस्कृत उपप्राध्यापक दीपक पराजुलीले रामधुनीको पौराणिक धार्मिक महत्त्व र रामायणसँगको गहिरो सम्बन्धबारे विस्तृत प्रवचन दिए। उनले रामधुनीको ऐतिहासिक र आध्यात्मिक महत्त्वलाई विशेष रूपमा चित्रण गरे ।
निमन्त्रणा कार्यक्रममा विशेष रूपमा सम्मानित गरिएका महानुभावहरूमा श्रीराम जन्मभूमि तीर्थक्षेत्रका महामन्त्री सम्पत राय, विश्व हिन्दू परिषद्का केन्द्रीय मन्त्री राजेन्द्र पङ्कज, अयोध्या महानगरका नगर प्रमुख गिरिश त्रिपाठी, अयोध्या जिल्ला परिषद्का अध्यक्ष आलोक कुमार लगायतका प्रतिनिधिहरूलाई माला, खादाले सम्मान गरी औपचारिक निमन्त्रणा पत्र प्रदान गरियो ।
भारतीय प्रतिनिधिहरूले नेपाललाई एक शान्त, सुन्दर र अत्यन्त आकर्षक मुलुकका रूपमा सम्बोधन गर्दै आफ्ना नागरिकहरूलाई यस क्षेत्रमा भ्रमण गर्न प्रोत्साहित गरे। उनीहरूले नेपालप्रति आफ्नो गहिरो माया, सम्मान र स्नेह व्यक्त गरे।
कोशी प्रदेश सरकारको यो पहल पर्यटन वर्ष २०८२ अन्तर्गत धार्मिक पर्यटन र सांस्कृतिक आदान-प्रदानलाई बढावा दिने महत्त्वपूर्ण कदम मानिएको छ। कार्यक्रममा कोशी प्रदेशका पर्यटन सचिव विशाल घिमिरेले भारतीय नागरिकहरूका लागि नेपालमा प्रदान गरिने पर्यटन सुविधा र आकर्षणका केन्द्रहरूबारे विस्तृत जानकारी प्रदान गरे ।
उपस्थित सबै महानुभावहरूले यो निमन्त्रणा कार्यक्रमले नेपाल र भारतबीचको सांस्कृतिक सम्बन्धलाई अझ सुदृढ र मैत्रीपूर्ण बनाउने विश्वास व्यक्त गरे। कोशी प्रदेश सरकारको यो पहलले दुई देशबीचको पर्यटन र सांस्कृतिक आदान-प्रदानलाई नयाँ आयाम प्रदान गर्ने अपेक्षा गरिएको छ ।
