मिकाइल आलम
इनरुवा । जिल्ला सुरक्षा समिति सुनसरीको आयोजनामा नागरिक सुनुवाइ कार्यक्रम सम्पन्न गरिएको छ । जिल्ला मातहतमा भए गरेका सुरक्षा गतिविधि तथा भावी दिनमा नागरिक र सुरक्षाकर्मी बीचको सम्बन्ध लाई थप सुमधुर गराउने उद्देश्यले शुक्रवार जिल्लाको हरिनगर गाउँपालीका वडा नम्बर ४ मा नागरिक सुनुवाई कार्यक्रम सम्पन्न गरिएको हो । उक्त कार्यक्रम जिल्ला प्रशासन कार्यालय सुनसरीका प्रमुख जिल्ला अधिकारी रामचन्द्र तिवारीको अध्यक्षता एवं हरिनगर गाउँपालिका अध्यक्ष गफार अन्सारीको प्रमुख आतिथ्यमा सम्पन्न भएको हो ।
प्रहरी प्रति जनताको गुनासो तथा सुझाव सुन्ने लागू औषध तथा कुलतबाट युवालाई जोगाउन र समुदाय र प्रहरी बीच समन्वय कायम गर्न नागरिक सुनुवाइ कार्यक्रम सञ्चालन गरिएको हो। अपराधजन्य गतिविधि रोकथाममा प्रहरी र नागरिकको उत्तिकै दायित्व रहेको जिल्ला प्रहरी कार्यालय सुनसरीका प्रमुख एसपी सुमन कुमार तिम्सिना बताउँछन् ।उनले प्रहरी नागरिकको सुरक्षार्थ २४ सै घण्टा अहोरात्र कार्यक्षेत्रमा खटिँदै आएको दाबी गर्दै प्रहरी निकाय शान्ति सुरक्षामा मात्र केन्द्रित नभई सामाजिक तथा भौतिक कार्यमा सक्रिय रहँदै आएको बताए ।
कार्यक्रमका प्रमुख अतिथि हरिनगर गाउँपालीका अध्यक्ष गफार अन्सारीले समाजमा अपराधजन्य क्रियाकलाप न्यूनीकरण गर्न प्रहरी र नागरिकबिचको समन्वय महत्त्वपूर्ण भएको औँल्याए ।उनले सामाजिक विकृति विसङ्गतिलाई रोक्न सके अपराधका घटना आफै निस्तेज भएर जाने बताए । प्रशासन र नागरिकको सहकार्य बिना समाजमा अमनचैन स्थापित नहुने उल्लेख गर्दै अध्यक्ष अन्सारीले समाजमा हुने विकृतिलाई जस्तो चस्माले हे¥यो उस्तै देखिने भएकाले सुशासन कायम गर्न जिल्लाका सुरक्षा निकाय ,प्रहरी र प्रशासन बीच समन्वय आवश्यक भएकोमा जोड दिए ।
प्रहरीले विभिन्न समयमा गाउँ गाउँमा पुगेर नागरिक सुनुवाइ गरेर जनताको सुझाव सङ्कलन गर्दै आइरहेको जनाउदै प्रहरीको काम कर्तव्यको विषयमा आएका रचनात्मक सल्लाह सुझाव लाई आत्मसाथ गर्दै अगाडी बढ्ने एसपी तिम्सिनाले बताए । जिल्ला सुरक्षा समितिका पदाधिकारीहरुको उपस्थितीमा आयोजित कार्यक्रममा प्रहरी सेवा प्रवाहलाई आवश्यकता अनुसार थप प्रभावकारी र आमनागरिक माझ पारदर्शी एवम् सहभागितामा अभिवृद्धि गर्ने उद्देश्यले नागरिक सुनुवाई कार्यक्रम गर्दै आएको जनाइएको छ ।
कार्यक्रममा हरिनगर गाउँपालिकाका सबै वडाका वडाध्यक्षहरु, सामुदायिक सेवा केन्द्रका पदाधिकारीहरु, स्थानीय बुद्विजिवी, संचारकर्मी तथा गाउँबासीहरुको बाक्लो उपस्थिति रहेको थियो भने कार्यक्रमका सहभागीहरुले सीमामा सिसिटिभि, चोरी तस्करी नियन्त्रण, विभिन्न घटनाको समयमै जानकारी, मदिराजन्य पदार्थको बिक्री वितरणमा निश्चित एरिया तोकिनुपर्ने र सडक अतिक्रमणमा रोक लगाउनुपर्ने, सेवा लिन जाने सेवाग्राहीलाई छिटोछरितो सेवा प्रवाह, विचौलिया नियन्त्रण जस्ता मुख्य सवालहरु उठान गरेका थिए ।
