मिकाइल आलम
इनरुवा । विभिन्न अपराधमा संलग्न भएर लामो समयदेखि फरार रहेका प्रतिवादी पक्राउमा सुनसरी प्रहरी सक्रिय भएको छ । अदालतको फैसला कार्यान्वयनका लागि फरार अपराधी पक्राउ गर्न विशेष अभियान सञ्चालन गरिएकोमा जिल्ला प्रहरी कार्यालय सुनसरीले २१ दिनको अवधिमा दुई सय ५८ जना फरार प्रतिवादीलाई पक्राउ गर्न सफल भएको जनाएको छ । विशेष अभियान अन्तर्गत अदालतको फैसला कार्यान्वयन, लागूऔषध तस्करी र कारोबार नियन्त्रण तथा अवैध भन्सार चोरी निकासी नियन्त्रण गर्ने कार्यलाई प्राथमिकता दिएर काम गरेअनुसार प्रतिवादीलाई पक्राउ गर्न सफल भएको सुनसरीका प्रहरी उपरीक्षक (एसपी) सुमनकुमार तिम्सिनाको भनाइ छ ।
पुस १ गतेदेखि पुस २१ गतेसम्म सुनसरी प्रहरीले दुई सय ५८ जना प्रतिवादीलाई पक्राउ गरेको एसपी तिम्सिनाले जानकारी दिए । नेपाल प्रहरी र कोशी प्रदेश प्रहरी कार्यालय विराटनगरको निर्देशन बमोजिम जिल्ला प्रहरी कार्यालय सुनसरी तथा मातहत प्रहरी कार्यालयबाट खटिएका प्रहरी टोलीले जिल्ला अदालतबाट फरार रहेका विभिन्न स्थानका प्रतिवादीलाई पक्राउ गरिएको हो ।
फरारलाई धमाधम पक्राउ गर्दै अपराध गरेर भागे पनि कानुनले छाड्दैनभन्ने सन्देश प्रवाह गर्न प्रहरी सफल भएको एसपी तिम्सिना बताउँछन् । भागिरहेका अपराधीलाई नियन्त्रणमा लिँदै प्रहरीले अपराध न्यूनीकरणमा भूमिका खेलिरहेको र कानुन तथा प्रहरीको काम कारबाहीप्रति सर्वसाधारणको भरोसा बढेको उनले बताए । ‘प्रहरी सक्रियतासँगै अपराधबाट पीडित भएकाले न्यायको महसुस गर्न पाएका छन्,’ उनले भने, ‘समग्र शान्ति सुरक्षाको अवस्थालाई मजवुत बनाउन तथा अपराध नियन्त्रण र अनुसन्धानमा पनि मद्धत पुगेको छ ।’ अपराधमा संलग्न कारबाहीको दायरामा नआउँदा कानुन कार्यान्वयनमा चुनौती थपिने गरेको उनले सुनाए । साथै पीडितले न्यायको अनुभूति गर्न नपाएको तथा विधिको शासनको उपहास भएको एसपी तिम्सिनाको भनाइ छ ।
‘अपराधमा संलग्नले कानुनले तोके अनुसारको सजाय भोग्नुपर्छ,’ उनले भने, ‘कतिपयको भने नाम, थर र वतन स्पष्ट नहुँदा पक्राउमा समस्या हुने गरेको छ ।’ उनका अनुसार अपराध गर्नेवित्तिकै पक्राउ नपर्दा कतिपय सुरुमै फरार बन्ने गरेका छन् । कतिपय अदालतले साधारण तारेख वा धरौटीमा छाड्ने र मुद्दाको किनारा लगाउँदा दोषी ठहर गरेपछि फरारबन्ने गरेको प्रहरी बताउँछ । पक्राउ गरेर प्रहरीले बुझाएपछि अदालतले प्रतिवादीलाई कैद सजाय भुक्तानका लागि करागार चलान गर्ने गरेको छ । जरिवानाको फैसला सुनाइएकालाई भने त्यसवापतको रकम असुलेर छाड्ने गरिन्छ ।
