सुनसरी । सुनसरीमा दुर्घटनामा परी तीनजनाको मृत्यु भएको छ । जिल्लाको भोक्राहा नरसिंह गाउँपालीका स्थित महेन्द्र राजमार्ग अन्तर्गत बलुवा चौकमा आइतवार बिहान बस र माइक्रोबस एकआपसमा ठोक्किँदा तीन जनाको मृत्यु भएको जिल्ला प्रहरी कार्यालय सुनसरीले जनाएको छ । जिल्ला प्रहरी कार्यालय सुनसरीका प्रवक्ता प्रहरी नायब उपरिक्षक योगराज खतिवडाका अनुसार दुर्घटनामा परी सख्त घाइते भएका तीनजनाको उपचारका क्रममा मृत्यु भएको हो भने अन्य १७ जना घाइते भएका छन्।
मृतकको परिचय खुलाउने कार्य भइरहेको प्रहरीले जनाएको छ। दुर्घटनामा परेको माइक्रो प्रदेश २-०१-००१ ज ००७ नम्बरको हो, जसले राजविराजबाट विराटनगरतर्फ यात्रा गरिरहेको थियो। त्यस्तै, ठोक्किने बस मे १ ख १७९९ नम्बरको हो, जसले पूर्वबाट पश्चिमतर्फ गइरहेको बताइएको छ। दुर्घटनापछि घाइतेहरूलाई उपचारका लागि नजिकैको अस्पताल पठाइएको छ।
