मुस्ताक आलम
इनरुवा । जिल्ला प्रहरी कार्यालय सुनसरी तस्करीमा आक्रामक देखिएको छ। सुनसरी प्रहरीले एक महिनामा ५७ लाख ६४ हजार ५५६ रुपैयाँको भन्सार छलीको माल सामान बरामद गरेको छ। एक महिनाअघि सुनसरीमा नयाँ प्रहरी प्रमुखका रुपमा प्रहरी उपरीक्षक केशव कुमार थेबेको निर्देशनमा चोरी पैठारी तथा तस्करी नियन्त्रणमा कडाइ थालिएको दाबी गरिएको छ । एसपी थेबेले आफ्नो सुरुवाती कार्यकालमा तस्करीविरूद्ध कारबाही चलाएका छन्।
गत असोज ६ गते मात्र सुनसरी प्रहरी प्रमुखको कार्यभार सम्हालेका दिन देखि नै उनले जिल्ला प्रहरी कार्यालय तथा मातहतका युनिटहरूलाई तस्करी नियन्त्रण गर्न कठोर भएर काम गर्न निर्देशन दिएका छन। त्यसैगरी जिल्लाको सम्पुर्ण नागरिकहरुको सुरक्षाको सवालमा समेत कटिबद्ध भएर कार्यसम्पादन गर्न मातहतको प्रहरी कर्मचारीलाई आदेश दिएका छन । यता सुनसरी प्रहरीले चाडबाडलाई लक्षित गरेर प्रहरी सहायता कक्षको निर्माण गरेको जिल्ला प्रहरी कार्यालय सुनसरीका सुचना अधिकार प्रहरी नायब उपरीक्षक योगराज खतिवडाले बताए ।
चाडबाडका समयमा हुने सक्ने विभिन्न आपराधिक क्रियाकलाप रोकथामका लागि चेकजाँचको व्यवस्था समेत कडा बनाइएको र सूचना संकलनका लागि सादा पोशाकका कर्मचारीसमेत खटाएको प्रहरी प्रमुख केशव कुमार थेवेले बताए । त्यसैगरी उनले भने ‘प्रहरी सम्पूर्ण नागरिकको साथमा छ, ढुक्क भएर कुनै पनि विकृति वा अपराधबारे समयमै सूचना दिन सुनसरीबासीलाई म आग्रह गर्दछु,’ थेबेले भने। नागरिकको सहयोगबिना अपराध नियन्त्रण असम्भव रहेकाले सूचना दिने मानिसको नाम गोपनीयता राखिने उनले विश्वास दिलाएका छन्। आफूले शून्य सहनशीलता साथ काम गर्ने तथा कुनै आपराधिक घटनामा प्रहरीले पूर्ण व्यावसायिक बनेर काम गर्ने एसपी थेबेले प्रतिवद्धता जनाएका छन् ।
