प्रतिनिधि सभा निर्वाचनमा नेकपा एमालेले सुनसरीमा उम्मेदवार फेरवदल गरेको छ । नेकपा एमालेले नेपाली कांग्रेस परित्याग गरेका अवुल हुसेन अन्सारीलाई सुनसरी ४ नम्बर निर्वाचन क्षेत्रका लागि उम्मेदवार बनाउने भएको छ।
एमालेले सुनसरी २ बाट रेवतीरमण भण्डारीलाई उम्मेदवार बनाउने निर्णय गरेपनि उक्त स्थानमा ४ नम्बर क्षेत्रमा उम्मेदवार हुने निश्चित भएका नेकपा एमालेका केन्द्रीय सदस्य जगदीश कुसियैतको नाम टुङ्गो लगाएकाे छ । एमालेले सुनसरी २ नम्बर निर्वाचन क्षेत्रमा भण्डारीलाई दिएको टिकट फिर्ता लिएको हाे । एमाले सुनसरीका इन्चार्जसमेत रहेका जगदीश कुसियैतले सुनसरीको सबै क्षेत्रबाट उम्मेदवारको नाम फाइनल भएको बताएका छन।
यसअघि सुनसरी १ का लागि उम्मेदवार बनाउने भनिएको सूर्य पान्धाकको स्थानमा टीकाराम माङ्लेनलाई उम्मेदवार बनाउने निर्णय गरेको थियाे । सुनसरी १ बाट टिकट पाउने टिकाराम अनेरास्ववियु सुनसरीका पूर्व अध्यक्ष हुन् ।सुनसरी ३ बाट भगवती चौधरीलाई उम्मेदवार बनाउने निर्णय गरेको छ । सुनसरी ३ बाट उम्मेदवार बन्न लागेकी चौधरी २०७९को निर्वाचन सोही क्षेत्रबाट विजयी भएकी थिइन् । सुनसरी २ बाट उम्मेदवार बन्न लागेका कुसियैत यस एमाले केन्द्रीय सदस्य तथा सुनसरी इन्चार्ज हुन् । अघिल्लो निर्वाचनमा उनी सोही क्षेत्रबाट ११२ मतान्तरले पराजित भएका थिए ।
