नेकपा एमालेले नेपाली कांग्रेस परित्याग गरेलगत्तै सुनसरी ४ बाट उम्मेदवार बनाएको अबुल हुसेन अन्सारीको उम्मेदवारी रद्द गरेको छ । जिल्ला अध्यक्ष पर्शुराम यादवका अनुसार पार्टी अध्यक्ष केपी शर्मा ओलीले अन्सारीलाई दिइएको टिकट रद्द गरेको जानकारी निर्वाचन आयोगमा पठाइने बताएका छन् ।
‘उहाँले हामीलाई फोन गरेर कुसियैत कमरेडले ४ मै उठ्ने र अर्को टिकट रद्द गरिदिन्छु भन्नुभयो’, ओलीसँगको फोन वार्ता सुनाउँदै यादवले भने । अन्सारीले आइतबार अध्यक्ष ओलीबाट खादा एमाले प्रवेश गरेलगत्तै चुनावको टिकट पाएका थिए । २०७० को दोस्रो संविधानसभा निर्वाचनमा तमलोपाबाट उम्मेदवार हुँदा २४६ मत पाएका उनी पछिल्लो समय नेपाली कांग्रेसमा आवद्ध थिए ।
एमालेले सुनसरी ४ को उम्मेदवारी सच्याएसँगै अब त्यहाँ कुसियैतको प्रतिस्पर्धा नेपाली कांग्रेसका उम्मेदवार एवं पूर्वमन्त्री ज्ञानेन्द्रबहादुर कार्कीसँग हुने भएको छ । २०७९ को प्रतिनिधिसभा सदस्य निर्वाचनमा कांग्रेस माओवादी सहितको गठबन्धनमा सामेल हुँदा कार्कीले ११२ मतले मात्र कुसियैतलाई हराएका थिए ।
यसअघि अन्सारी एमालेबाट क्षेत्र नम्बर ४ को उम्मेदवार हुने भएपछि कुसियैत २ मा जाने भएका थिए । त्यहाँबाट एमालेले प्रदेश मन्त्री तथा दोस्रो संविधानसभा सदस्य रेवतीरमण भण्डारीको उम्मेदवारी टुंगो लगाएको थियोे । कुसियैत उनको क्षेत्रमा जाने कुराले उनी असन्तुष्ट थिए । अब २ मा भण्डारी नै एमाले उम्मेदवार हुने जिल्ला अध्यक्ष यादवले बताए ।
