इनरुवा । सुनसरीमा एकजना वडाध्यक्षलाई विद्यालय व्यवस्थापन समितिको अध्यक्ष न बनाउँदा प्रअमाथि आक्रमण भएको छ । सुनसरीको बर्जु गाउँपालिका १ स्थित रामगञ्ज बेलगछियाको शुक्रबारेमा रहेको नजदुर्गा माविको विद्यालय व्यवस्थापन समितिको अध्यक्ष बनाउने विषयमा विवाद हुँदा प्रधानाध्यापक ३८ वर्षिय कनचन मण्डलमाथि दुर्ववहार गरिएको हो ।
सोमबार विद्यालय व्यवस्थापन समितिका लागि अभिभावकबाट सदस्यहरु छनौट भएको र शिक्षक प्रतिनिधि समेत छनौट भएकोमा गणपुरक संख्या र अध्यक्ष कसलाई बनाउने विषयमा बिवाद हुदाँ मण्डल माथि बर्जु गाउँपालिका १ का वडाध्यक्ष श्याम गुरुङको उपस्थितीमा दुर्ववहार गर्दै आक्रमण गरिएको स्थानीयले बताएका छन् ।
विद्यालयमा व्यवस्थापन समिति अध्यक्ष छनौटमा वडाध्यक्ष श्याम गुरुङ आफैंले इच्छा जाहेर गरेको बताउदै पीडित प्रअ मण्डलले ऐन नियमले अरु सदस्यहरु हुदाँहुदै वडाध्यक्ष नै विद्यालय व्यवस्थापन समितिको अध्यक्ष बन्न नपाउने भनेपछि आफू माथि आक्रमण गरिएको जानकारी दिए ।
पीडित प्रअ मण्डलले वडाध्यक्षको निर्देशनमा आफूमाथि वर्जु १ का मदन गुरुङ, टेकबहादुर गुरुङ ,देवु गुरुङ र शिक्षक प्रतिनिधि शंकर गुरुङले आक्रमण गरेको गुनासो गरे । बैठकमा अध्यक्ष चयन गर्नुपर्ने, हामीले नै भनेको व्यक्ति वा वडाध्यक्ष श्याम गुरुङलाई नै बनाउनुपर्ने दबाव दिएकाले प्रअ मण्डलले नियमसंगत गर्नुपर्ने सुझाएपछि तथानाम गालीगलौज सहित हात र मुक्काले कुटपिट गर्नुका साथै माटो र अविर मिसाएर शरिरभरी दलेर दुर्ववहार गरिएको स्थानीय प्रत्यक्षदर्शीहरुले जानकारी गराएका छन् ।
यता घटनाको बारेमा संलग्न भनिएका वडाध्यक्ष श्याम गुरुङले घटनामा आफु प्रत्यक्ष संलग्न नभएको र समितिमा आफूलाई सदस्यहरुले नै अध्यक्षको प्रस्ताव गरेकोमा प्रअ मण्डलले बहुमत सदस्यको निणर्य हुनुपर्ने र वडाध्यक्ष नै अध्यक्ष बस्न नमिले भनेकाले केही विवाद भएको तर आक्रमण नै नभएको दावी गरे । प्रअ मण्डल माथि भएको आक्रमण प्रति वर्जु गाउँपालिकाका अध्यक्ष रघुन्दन चौधरीले समेत दुख व्यक्त गर्दै दोषी जो कोहीलाई पनि कार्वाहीको दायरामा ल्याइने बताए । शिक्षा र शिक्षक माथिको आक्रमण वा दुर्ववहार गाउँपालिकालाई सहय नहुने बताउदै अध्यक्ष चौधरीले कार्यपालिका बैठकमा पनि प्रअ आक्रमणको घटना उठेकाले यसको छानविन गर्दै दोषी माथि कार्वाही गर्न प्रहरीलाई सहयोग गर्ने बताए ।
