मिकाइल आलम
भण्टावारी । केही दिनयता जारी भारी वर्षाका कारण सुनसरीका ग्रामीण क्षेत्रका सडकमा आवत–जावत गर्न कष्टकर बनेको छ । जिल्लाका धेरैजसो ग्रामीण क्षेत्रका सडकमा वर्षाको पानी जमेर हिलाम्मे हुँदा सर्वसाधारणसँगै सवारीसाधन सञ्चालनमा अवरोध उत्पन्न हुने गरेको स्थानीय बताउँछन् ।
जिल्लाको बर्जु, देवानगञ्ज, गढी, हरिनगर, भोक्राहा नरसिंह, कोशी गाउँपालिकालगायत स्थानीय तहका ग्रामीण क्षेत्रका सडकमा आवत–जावत गर्न समस्या भएको गुनासो आएको हो । जथाभावी डोजरको प्रयोग गरेर खनिएका जिल्लाका ग्रामीण सडकमा पानी पर्दा सर्वसाधारणलाई पैदल हिँड्न र सवारीसाधन गुड्न समस्या भएको भोक्राहा नरसिंह गाउँपालिका–८ स्थित सोनयाहीका मुक्तार मियाँले गुनासो गरे । वडा कार्यालय, गाउँपालिका, जिल्ला समन्वय समिति र निर्वाचन पूर्वाधार क्षेत्र विकासको रकमले ग्रामीण भेगमा उपभोक्ता समितिमार्फत् वर्षायाममा मनपरी सडक खनिएको कारण आवत–जावत बर्सेनि समस्या आउने गरेको उनको कथन छ । ‘उपभोक्ता समिति र कोटेशनको काम मनपरी तरिकाले भएको पाइन्छ’ उनले भने, ‘विकासको नाममा हतार– हतार बाटो खनिएको छ, जुन काम लाग्ने छैन । ती सडकमा सवारीसाधन त के मान्छे हिँड्नसमेत मुस्किल छ ।’
अविरल वर्षाका कारण सडक हिलाम्मे भएपछि जिल्लाका ग्रामीण क्षेत्रका स्थानीयहरू कष्टकर यात्रा गर्दै आएका छन् । ‘हरिनगर गाउँपालिका वडानम्बर १ र २ जोड्ने बाटो वर्षाले हिलाम्मे बन्दा हिँड्न सकिने अवस्था छैन’ स्थानीय नौसाद अन्सारीले भने, ‘लगातारको वर्षापछि कच्ची सडकहरू ठाउँ– ठाउँमा भत्किएका छन्, बाँकी हिलाम्मे छन्, आवत–जावत गर्न निकै मुस्किल छ ।’ गन्तव्यसम्म पुग्न कहिले बिग्रिएको बाटो त कहिले गाडी धकेल्दै पुग्नुपर्ने बाध्यता रहेको उनको भनाइ छ ।
ग्रामीण भेगका बाटो हिलाम्मे बनेपछि उपचार गराउन जाने बिरामीसमेत प्रभावित हुँदै आएको अन्सारीले बताए । ‘राति केही भइहालेमा तत्काल एम्बुलेन्स जाने अवस्था छैन’ उनले थप्दै भने, ‘तर, सम्बन्धित निकाय मौन छन्, कुनै चासो लिएको छैन, पटक–पटक स्थानीय सर्वसाधारणले जनप्रतिनिधिको ध्यानाकर्षण गराए तर, कुनै सुनुवाइ भएन ।’
वर्षाका कारण कच्ची सडकहरू ठाउँ–ठाउँमा भत्किनुका साथै खाल्डाखुल्डीले हिलाम्मे भएपछि सर्वसाधारण जोखिमपूर्ण यात्रा गर्न बाध्य छन् । ‘ग्रामीण क्षेत्रको सडकको अवस्था हेर्दा खेतमा रोपाइँ गर्न गएको जस्तो देखिन्छ’ अर्का स्थानीय सुरज यादवले भने, ‘काम परेपछि जोखिमपूर्ण यात्रा गरेर भए पनि जानैप¥यो ।’ स्थानीय तहका गाउँ–गाउँमा सडक पु¥याइए पनि जिल्लामा निर्माण गरिएका अधिकांश ग्रामीण सडक मापदण्ड विपरीत निर्माण गरिएको हुँदा हल्का वर्षामा समेत बिग्रने गरेको जानकार बताउँछन् ।
