सुनसरी । हतियारसहित मस्ट वान्टेड भारतीय अपराधी पक्राउ परेका छन् । सशस्त्र प्रहरी बल बिओपी रानी बिराटनगरबाट सप्रनी मौसममा पोखरेल नेतृत्वको टोलीले बुधबार राती १० :३० बजेको समयमा एउटा थोत्रे बोरा बोकेको मान्छे पारी बाट नेपाल आउँदै गरेको देखेपछि चेकजाँचकाे क्रममा हतियार र लागुऔषधसहित ति भारतीय अपराधीलाई पक्राउ गरिएको हो ।
रातिको समयमा सडकमा प्लास्टिक टिप्ने जस्तो हुलिया बनाई थोत्रे बोरामा लागुऔषध र कटुवा पेस्तोल सहित नेपाल आउदै गरेको अवस्थामा भारतको जोगबनी नगर पञ्चायत – ९ इन्द्रा नगर बस्ने बर्ष ४१ काे पप्पु कुमार पटेललाई पक्राउ गरिएको बिओपी रानी प्रमुख मौसम पोखरेलले जानकारी दिए ।
पटेल राती अंध्यारोकाे फाईदा उठाउँदै विराटनगर १६ काे हुलास चौक दक्षिणगेट नजिक रहेको जङ्गे सीमा स्तम्भ नंं. १८० नजिक डम्पिङ साईडकाे बाटो भएर प्लास्टिक तथा फोहोर बाट कवाडी टिप्दै हिडने सरह हुलीया बनाई आउँदै गर्दा पक्राउ परेका हुन । पक्राउ परेको पटेलले थोत्रे बोरा भित्र फोहोर तथा माटो लागेको एक हाफ कट्टुमा बेरेर राखेको होम मेड कटुवा पेस्तोल र दुई वटा कालो प्लास्टिकको झोलामा राखेको लागुऔषध एभिल इन्जेक्सन २ सय ९२ एम्पुल र लुपिजेसिक इन्जेक्सन २ सय ९५ एम्पुल बरामद गरिएको बताइएको छ ।
नेपालमा लागुऔषध र हतियारको ओसारपोसार तथा कारोवार गर्ने पटेल भारतमा पनि बिभिन्न समय र स्थानहरुमा चन्दा , फिरौती, लुटपाट , हत्या , आर्म्स एक्ट, तथा उत्पात मचाएको आरोपहरुमा मुद्दा समेत रहेको सशस्त्र प्रहरीकाे प्रारम्भिक अनुसन्धानबाट खुलेको हो ।
