इनरुवा । लागूऔषध तस्करी न्यूनीकरण गर्न सुनसरी प्रहरीले अभियान चलाएसँगै धमाधम कारोबारी पक्राउ पर्न थालेका छन् । नेपाल-भारत खुल्ला सीमाका कारण लागूऔषध र गाँजा कारोबार हुँदै आएकोमा जिल्ला प्रहरी कार्यालय सुनसरीमा नयाँ प्रहरी प्रमुखका रूपमा संजयसिंह थापा आएपछि त्यस्ता अवैधानिक क्रियाकलाप नियन्त्रण गर्न प्रहरीले विशेष अप्रेसन चलाएपछि कारोबारी पक्राउ पर्ने क्रम बढेको हो ।
खुल्ला सीमाको फाईदा उठाएर लागूऔषध र गाँजा कारोबार विगतदेखि नै हुँदै आएकाले त्यस्ता कारोबार रोक्न सुनसरी प्रहरीले अभियान चलाएपछि ठुलो मात्रामा लागूऔषधसहित ८० जनालाई पक्राउ गरी कारबाही गरिएको सुनसरी प्रहरीले जनाएको छ । दुईमहिनाको अवधिमा जिल्ला प्रहरी कार्यालय सुनसरीले विभिन्न लागूऔषध कारोबारमा संलग्न रहेका ८० जनालाई पक्राउ गरी कानुनी कारबाही गरेको जनाएको छ । जिल्ला प्रहरी कार्यालय सुनसरीका अनुसार चालू आर्थिक वर्षको हालसम्म ब्राउन सुगर ४५८ ग्राम ४६५ मिलीग्राम बरामद गरेकोमा ३८ जनालाई कानुनी कारबाही गरिएको छ भने २१० केजी ८०० ग्राम गाजा बरामद गरेकोमा १० जना पुरुष र एकजना महिला गरी ११ जनालाई कारबाही गरिएको सुनसरी प्रहरीले बताएको छ् ।
यसैगरी भारतीय बजारबाट लुकाएर ल्याइएको नेपालमा प्रतिबन्धित लागूऔषध नाइट्रोभेट १९४१ ट्याबलेट, स्पास्मोप्रोक्सिभिन २८१३ लगायत ठूलो मात्रामा लागूऔषधसहित ३१ जनालाई पक्राउ गरी कानुनी कारबाही गरेको जिल्ला प्रहरी कार्यालय सुनसरीका प्रमुख एसपी संजयसिंह थापाले जानकारी दिए । यसैगरी प्रतिबन्धित औषधिसहित औषधि व्यवस्थापन विभाग पठाइएकोमा औषधिसहित औषधि व्यवस्थापन विभागले अन्य तीनजना व्यक्तिलाई समेत कारबाही गरिएको सुनसरी प्रहरीले जनाएको छ । सीमावर्ती क्षेत्रहरुमा पछिल्लो समयमा प्रहरीले चेकजाँचमा कडाई गरेपछि खुल्ला सीमाको फाईदा उठाएर लागूऔषध र गाँजाको कारोबार गर्ने कारोवारीहरु धमाधम पक्राउ पर्न थालेको एसपी थापाको भनाइ छ । गैरकानुनी कारोबार रोक्न सक्रियताका साथ लागेकाले पछिल्लो समय लागूऔषध, हातहतियार, चोरीपैठारी, राजस्व छली जस्ता गैरकानुनी कारोबार नियन्त्रणउन्मुख अवस्थामा रहेको उनले दाबी गरे ।
