कोशी गाउँपालीका वडा नम्बर ७ स्थित हरिपुरमा सम्पन्न वडाध्यक्ष क्रिकेट कप प्रतियोगिताको उपाधी भण्टाबारीले जितेको छ । शनिवार सम्पन्न फाइनल खेलमा भोक्राहालाई ५ विकेटले हराउदै कोशी क्रिकेट क्लब भण्टाबारी दोस्रो वडाध्यक्ष क्रिकेट कप प्रतियोगिताको च्याम्पियन बनेको हो । फाइनल खेलमा टस जितेर पहिले ब्याटिङ्ग गर्दै भोक्राहाले १८ औं ओभरमा अल आउट हुदै ५९ रनको योगफल तयार पारेको थियो ।
६० रनको विजयी लक्ष्य पछ्याउदै जवाफी ब्याटिङ्ग गरेको भण्टाबारीले १० औं ओभरमा ५ विकेटको क्षतिमा लक्ष्य पूरा गरेको थियो । भण्टाबारी लाई च्याम्पियन गराउन सकिल अहमदले सर्वाधिक ४ विकेट लिए भने सहवाज आलम र आल्मिन आलमले २-२ विकेट लिए ।
खेलको म्यान अफ द म्याच भण्टाबारीका सकिल अहमद घोषित भए । यस्तै प्रतियोगिताको उत्कृष्ट खेलाडी समेत उनी नै भए भने उत्कृष्ट बलर भण्टाबारीकै सहवाज आलम भए । विजेता तथा उपविजेता खेलाडीहरुलाई फाइनल खेलका प्रमुख अतिथी कोशी गाउँपालीका वडा नम्बर ७ का वडाध्यक्ष लालदेव सदा लगायतले पुरस्कार वितरण गरेका थिए ।
विजेता भण्टाबारीले सिल्ड, मेडल सहित नगद २५ हजार रुपैयाँ पुरस्कार हात पारे भने उपविजेता भोक्राहाले ११ हजार पुरस्कार पाएको आयोजकले जनाएको छ । कोशी गाउँपालीका वडा नम्बर ७ को
सहयोगमा एम्स युवा क्लबले आयोजना गरेको क्रिकेट प्रतियोगितामा विभिन्न आठ वटा टोलीको सहभागिता रहेको थियो ।
