मिकाइल आलम
इनरुवा । सीमावर्ती क्षेत्रमा लागूऔषध कारोबार न्युनिकरण तथा नियन्त्रण गर्न सुरक्षाकर्मीले कडाइ गरेपछि दिनहुँजसो लागूऔषध ओसारपसार गर्ने व्यक्ति पक्राउ पर्न थालेका छन् । पछिल्लो केहीदिनको अवधिमा जिल्लाको कोशी गाउँपालीकास्थित सीमावर्ती लौकही क्षेत्रबाट मलद्धारदेखि घडीमा लुकाएर लागूऔषध ओसारपसार गर्ने एकदर्जन बढी व्यक्ति पक्राउ गरेको सशस्त्र प्रहरी बल नेपाल सुनसरीका प्रमुख सशस्त्र प्रहरी उपरिक्षक निर्मल थापाले जानकारी दिनुभयो । नेपाली युवायुवती भारतीय बजारमा जाने र खासगरी लागूऔषध ओसारपसार गर्ने क्रम बढेको हुनाले सीमा नाकामा सोहि अनुसार निगरानी बढाएपछि त्यस्ता व्यक्ति पक्राउ पर्न थालेको उहाँको भनाइ छ । सशस्त्र प्रहरीले चेकजाँचमा कडाइ गरेपछि लागूऔषध कारोबारीले नयाँ नयाँ जुक्ती अपनाएर लागूऔषध ओसारपसार गर्ने गरेको सशस्त्र प्रहरी उपरिक्षक थापाले बताउनुभयो । उहाँका अनुसार पछिल्लो समय भारतीय बजारबाट मलद्धार देखि साइकलको सिटमुनी लुकाएर लागूऔषध ब्राउन सुगर भित्र्याउने कारोबारी पक्राउ परेका छन् ।
चारसय ६६ जना पक्राउ
जिल्ला प्रहरी कार्यालय सुनसरीका प्रवक्ता एवं प्रहरी नायब उपरिक्षक योगराज खतिवडाका अनुसार चालु आर्थिक वर्षको हालसम्मको अवधिमा लागूऔषध सम्बन्धी तीन सय १७ वटा मुद्धा दर्ता भएकोमा चारसय ६६ जना पक्राउ परेका छन् । जिल्लाको विभिन्न स्थानबाट चालु आर्थिक वर्ष २०८१/०८२ को चैत २५ गतेसम्म छ हजार चारसय ५७ केजी गाँजा, चारसय ४४ दशमलव ३५३ मिलिग्राम ब्राउन सुगर सहितका लागूऔषधका साथै ७७ वटा सवारी साधन नियन्त्रणमा लिई कानुनी कारबाही अगाडी बढाएको उहाँले जानकारी दिनुभयो । खासगरी १६ वर्षदेखि ३५ वर्ष उमेर समूहका युवायुवतीहरु लागूऔषधको दल दलमा फसेको पाइएको बताउनुहुँदै प्रहरी नायब उपरिक्षक खतिवडाले यस्ता विकराल समस्या समाधान गर्न परिवार र समाजका हरेकवर्ग सचेत हुनुपर्नेमा जोड दिनुभयो ।
