मिकाइल आलम
सुनसरी । सुनसरीमा दुर्व्यसनी विरुद्धको अभियानलाई सशस्त्र प्रहरीले तीव्रता दिएको छ । उपत्यकापछि सबैभन्दा बढी लागूऔषध प्रयोगकर्ता भएको सुनसरी जिल्लामा न्यूनीकरण गर्ने अभिप्रायले सशस्त्र प्रहरीले नेपाल प्रहरी तथा जनप्रतिनिधीसंग समन्वय गर्दै बिहिवारदेखि कोशी गाउँपालीका ८ स्थित भण्टाबारीबाट लागूऔषध विरुद्ध सचेतनामूलक कार्यक्रमको थालनी गरेको छ । भारतसँग खुला सीमा नाकाका कारण पछिल्लो समय प्रमुख समस्याका रूपमा देखापरेको लागूऔषध दुर्व्यसनी न्यूनीकरण गर्ने उद्देश्यले जिल्लाका विभिन्न बिद्यालयहरु देखि गाउँ गाउँमा दुर्व्यसनी विरुद्ध अभियान चलाएको सशस्त्र प्रहरी बल सुनसरीका प्रमुख सशस्त्र प्रहरी उपरिक्षक निर्मल थापाले जानकारी दिए ।
बिद्यालयस्तर बाटै विद्यार्थीहरुलाई लागूऔषधका नकारात्मक पक्षका बारेमा जानकारी गराउदै समाज सुधारमा उनीहरूलाई प्रहरीले सक्रिय बनाएको छ । खासगरी लागूऔषध प्रयोगकर्ता तथा कारोबार गर्ने अधिकांश युवाअवस्थाका देखिएकोले त्यस्तो गलतबाटो जानबाट बचाउदै समाज विकासमा केन्द्रित बनाउन विद्यार्थी एवं युवाहरुलाई सचेतनामूलक कार्यक्रम दिदै आएको उनको भनाइ छ । खासगरी भारतसँग सीमा जोडिएका बिद्यालय र गाउँहरुमा लागूऔषधको प्रयोग र सहज बिक्री वितरणका कारण घर–घरमा समस्या उत्पन्न हुन थालेपछि त्यसविरुद्धको अभियानलाई तीव्रता दिइएको हो ।
भारतसँग सीमा जोडिएको सुनसरीको कोशी गाउँपालिका क्षेत्रमा धेरै युवाहरु लागुऔषधको कुलतमा पर्दा परिवार नै संकटमा पर्न थालेपछि सीमावर्ती क्षेत्रमा पुगेर भारतीय सुरक्षाकर्मी संग सहकार्य गर्दै सचेतनामूलक कार्यक्रम आयोजना गरेको थापाको भनाइ छ । स्थानीयहरुबाट लागूऔषधको सहज पहुँचका कारण अधिकांश युवाहरु दुर्व्यसनमा परेको हुँदा परिवारमा हिंसा र समाजमा शान्ति सुरक्षाको समस्या उत्पन्न भएको गुनासो आएपछि सचेतनामूलक कार्यक्रम आयोजना गरेको उनले बताए ।
कोशी गाउँपालिकाका अध्यक्ष ऐयुब अन्सारीले लागूऔषधका कारोबारीले यूवा विद्यार्थीमार्फत लागूऔषध कारोबार गर्ने गरेको पाइएको हुँदा अभिभावकवर्ग चनाखो हुनुपर्ने बताउँछन् ।समाजप्रति समर्पित हुन तथा सम्भ र शान्त समाज निर्माणमा युवावर्गको भूमिका अहम् भएकोले लागूऔषध न्यूनीकरण गर्न आफूले गाउँपालीका बाटै दुर्व्यसनी विरुद्धको अभियान संचालन गरेको उनले बताए । लागूऔषध विरुद्धको अभियानमा आफूले व्यक्तिगत तथा गाउँपालीकाको तर्फबाट साथ र सहयोगलाई निरन्तरता दिने अध्यक्ष अन्सारी बताउँछन् ।
लागूऔषधको ओसार–पसार तथा बिक्री वितरणमा लागेका संगठित अन्तर्राष्ट्रिय आपराधिक गिरोहले नेपालमा हवाई तथा स्थलमार्गवाट लागूऔषध पदार्थ भित्र्याउने गरेको बताउदै उनले लागूऔषधको बढ्दो प्रयोगबाट युवाशक्तिलाइ जोगाइ राष्ट्र निर्माणमा सरिक हुन सबैको साथ,सहयोग आवश्यक भएको बताए ।प्रहरी प्रशासन र जनप्रतिनिधिको प्रयासमा मात्र यति ठुलो समस्या निराकरण नहुने भएकोले विद्यार्थी, अभिभावक,शिक्षकशिक्षिका, युवावर्ग लगायत सबैमा लागूऔषध विरुद्धको अभियानमा जुट्न अध्यक्ष अन्सारीको आग्रह छ ।
