सुनसरी । सुनसरी जिल्लामा भारोत्तोलन खेलको सम्भावना रहेको भन्दै यस खेलको विकास गर्नुपर्नेमा कोशी गाउँपालीकाका सामाजिक अगुवा कुरवान मन्सुरीले जोड दिएका छन् । नेपाल भारोत्तोलन संघको अध्यक्ष रामकृष्ण श्रेष्ठ (बोस) लाई काठमाडौमा मंगलबार भेट्दै उनले भारोत्तोलन खेलको विकास र विस्तारमा आवश्यक पहल गर्न आग्रह गरेका छन् । नेपाल भारोत्तोलन संघको अध्यक्ष रामकृष्ण श्रेष्ठ (बोस) ले मन्सुरीलाइ भारोत्तोलन लोगो अन्कित खादा ओढाइ स्वागत गरे ।
खासगरी सुनसरी जिल्लाका गाउँ गाउँमा भारोत्तोलन खेलप्रति युवाहरूको आकर्षण देखिएको हुँदा त्यसप्रति ध्यान दिएर योजनाबद्ध तरिकाबाट अगाडि बढ्न सकेको अवस्थामा थुप्रै राष्ट्रिय र अन्तर्राष्ट्रिय स्तरका खेलाडी उत्पादन गर्न सकिने मन्सुरी बताउँछन् । नेपाल भारोत्तोलन संघको अध्यक्ष रामकृष्ण श्रेष्ठ (बोस) लाई ध्यानाकर्षण गराएपछि उहाँ पनि यसप्रति चासो लिएको बताउदै उनले निकट भविष्यमा भारोत्तोलन खेललाई गाउँ गाउँमा विस्तार गरिनेमा आफू पूर्ण आशावादी भएको बताए ।
