भण्टाबारी । ७० औं अन्तर्राष्ट्रिय दिवसको अवसरमा सुनसरी भन्सार कार्यालयको आयोजनामा अन्तरक्रिया कार्यक्रम सम्पन्न भएको छ । प्रदेश नम्बर १ का आर्थिक मामिला तथा योजना मन्त्रालयका सचिव तथा भन्सार विभागका पूर्व महानिर्देशक सुमन दाहालको प्रमुख आतिथ्य तथा उद्योग वाणिज्य संघ इनरुवाका अध्यक्ष विरेन्द्रकुमार साहको अध्यक्षतामा मंगलबार आयोजित अन्तरक्रिया कार्यक्रम सम्पन्न भएको हो ।
खुला सीमानाका कारण हुँदै आएको चोरीपैठारी रोक्न थप कडाइ गरिनुपर्नेमा उक्त कार्यक्रमका सरोकारवालाहरुले बताएका छन् । सुनसरी भन्सार कार्यालय सेतुबन्ध कोशी ब्यारेज सुनसरीले आयोजना गरेको कार्यक्रममा बोल्ने वक्ताहरुले चोरीपैठारी रोक्न सीमामा तैनाथ सुरक्षाकर्मी र भन्सार प्रशासनले थप निगरानी बढाउनुपर्नेमा जोड दिए । खुला सीमाका कारण पूर्ण रूपमा तस्करी रोक्न सम्भव नभएपनि नियन्त्रण कार्यमा कटिबद्ध भएर लागेको प्रमुख भन्सार अधिकृत अर्जुनकुमार न्यौपानेले जानकारी दिए । नेपाल भारतबीच रहेको खुला सीमाका कारण हुँदै आएको चोरीपैठारी नियन्त्रणमा भन्सारका कर्मचारीका साथै सुरक्षाकर्मी लागिपरेको बताउदै उनले चोरीपैठारी नियन्त्रणमा सबै तह र क्षेत्रबाट सहयोग आवश्यक रहेको बताए।
खुला सीमा नाकाका कारण हुँदै आएको राजस्व चुहावटमा उल्लेख्य सुधार आएकोले राजस्व संकलन बढेको सुनसरी भन्सार कार्यालयले जनाएको छ । सुनसरी भन्सार कार्यालयले चालु आर्थिक वर्षमा ५३ करोड ७६ लाख ४३ हजार राजस्व संकलन गर्ने लक्ष्य लिएकोमा चालु आर्थिक वर्षको साउनदेखि पुस्तक महिनासम्म ३२ करोड ९२ लाख ७२ हजार राजस्व संकलन गरेको प्रमुख भन्सार अधिकृत न्यौपानेले जानकारी दिए । जुन वार्षिक लक्ष्यको ६१ दशमलव २४ प्रतिशत हो । सुनसरीको नाकाहुँदै भारतीय बजारबाट आलु,प्याज,चामल,धान, भुस, गहुँलगायतका कृषिजन्य वस्तु बढी मात्रामा आयात भएको देखिन्छ ।
सुरक्षाकर्मी र सर्वसाधारणलगायतसँग राजस्व चुहावट धेरैहदसम्म नियन्त्रण गर्न सफल भएकाले राजस्व असुलीमा वृद्धि भएको प्रमुख भन्सार अधिकृत न्यौपानेको दाबी छ । उक्त कार्यक्रममा राजस्व अनुसन्धान कार्यालय इटहरीका प्रमुख तीर्थराज खनाल,उद्योग वाणिज्य संघ लौकहीका अध्यक्ष विशेश्वरप्रसाद गुप्ता, प्लान्ट क्वारेन्टाइन कार्यालय भण्टाबारीका प्रमुख हरि साह,पशु क्वारेन्टाइन कार्यालय भण्टाबारीका प्रमुख सरीलाल चौधरी, सीमा प्रहरी चौकी भण्टाबारीका प्रमुख सई नागेश्वर थानदार,कोशी ब्यारेज प्रहरी प्रमुख सई निरोज कार्की, भन्सारका कर्मचारी,व्यवसायी, भन्सार एजेन्ट,संचारकर्मीलगायतको उपस्थिति रहेकोे थियो भने उक्त कार्यक्रम सुनसरी भन्सारका राजेन्द्र थापाले संचालन गरेका थिए ।
