सुनसरी । सुनसरी जिल्लाको धरानबाट ठुलो परिणाममा लागूऔषध ब्राउन सुगरसहित पक्राउ परेका राजकुमार सिंह भारतीय भएको भारतीय प्रहरीले नै पुष्टि गरिसकेको छ । किर्ते गरी जिल्ला प्रशासन कार्यालय सप्तरीबाट झुठा प्रमाण पेश गर्दै नेपाली नागरिकता लिएका उनी भारतीय भएको भारतीय प्रहरीले आधिकारिक रुपमै पुष्टि गरेपनि आर्थिक प्रलोभनसँगै राजनीतिक दबाब दिएकै कारण सिंह सम्बन्धमा किर्ते नागरकिताबारे अझै छानबिन अगाडि बढाउन सप्तरी प्रहरीले आलटाल गरिरहेको पाइएको छ ।
धरानबाट २०७७ साल मंसिर १९ गते पक्राउ परेका सिंह ब्राउन सुगर कारोबारी समेत हुन् । जिल्ला अदालत सुनसरी निर्णयअनुसार उनी अहिले पूर्वपक्षका जेलमा छन् । ब्राउन सुगर मुद्दामा सुनसरी जिल्ला अदालतको आदेश उच्च अदालत बिराटनगरले समेत सदर गरिदिएपछि पुर्पक्षका लागि जेलमा रहेका भारतीय नागरिक राजकुमार सिंहलाई छुटाउन पुनः चलखेल भइरहेको पाइएको छ । लागूऔषध मुद्दामा जेलमा रहेका सिंहसँग किर्ते गरी सप्तरीबाट नेपाली नागरिकतासमेत लिएको प्रहरी अनुसन्धानले देखाएको हो ।
नेपाली नागरिकको हकमा र विदेशी नागरिकको हकमा छुट्टाछुट्टै कानुनी प्रावधानको व्यवस्था छ श्रोतले भन्यो यदि लागूऔषध ब्राउन सुगरसहित पक्राउ परेका सिंह भारतीय वा विदेशी भएको पुष्टिमा उनलाई छुटाउन गार्हो हुने भएकोले उनी भारतीय भएको आवश्यक प्रमाण हुँदा समेत उनको नागरिकता सम्बन्धमा छानबिन गरिएको छैन । पक्राउ परेका सिंह ठुलो लागूऔषध गिरोहका सदस्य भएकाले उनी दोषी साबित भएको अवस्थामा अन्य गिरोहका बारेमा समेत खुल्ने डरले छुटाउन ठुलो आर्थिक चलखेलका साथै राजनीतिक दबाबसमेत उत्तिकै रहेको श्रोतको दाबी छ । लागूऔषध मुद्दामा जेलमा रहेका भारतीय नागरिक सिंहलाई किर्ते नागरिकता मुद्दामा कारबाही अगाडि बढाउने भन्दै सप्तरी प्रहरीको पत्राचारअनुसार सुनसरी जिल्ला अदालतले झुम्का कारागारलाई पत्राचार गर्दै अभियुक्त सिंहलाई बयानका लागि सप्तरी पठाउन भनिएपनि राजनीतिक दबाबका कारण उनको बयान हुन सकेको छैन । लागूऔषध कारोबारीसँगै नेपाली र भारतीय गरी दोहोरो नागरिकता लिएका व्यक्ति भएको सबै प्रमाण हुँदाहुँदै पनि राजनीतिक संरक्षण पाएकै कारण सिंह सम्बन्धमा कारबाही अगाडि नबढाइएको श्रोतको आरोप छ् ।
दोहोरो मुद्दा चल्ने भएपछि छुटाउन गाह्रो हुने भन्दै दोहोरो नागरिकताको मुद्दा तत्काल नचलाउन सप्तरी प्रहरीमाथि दबाब दिएको श्रोतको भनाइ छ् । जिल्ला प्रहरी कार्यालय सप्तरीको चलानी नम्बर १०११० मिति २०७८ असार १३ गते थुनामा रहेका सिंहलाई नागरिकता सम्बन्धि कसुर बयानमा कार्यका लागि जिल्ला सरकारी वकिल कार्यालयले सप्तरी पठाई पुनः झुम्का कारागार फिर्ता ल्याउन सुनसरी जिल्ला अदालतले झुम्का कारागार कार्यालयको नाममा पत्र काटेको थियो ।
ठुलो परिणाममा रंगेहात पक्राउ परेका सिंहको यथेष्ट पक्राउका बाबजुद महिनौंसम्म नागरिकता सम्बन्धमा छानबिन अघि नबढ्दा श्रोतको दाबीमा बल पुगेको देखिन्छ । लागूऔषध ब्राउन सुगरसहित पक्राउ परेका सिंहलाई छुटाउन पुनः ठुलो चलखेल भइरहेको श्रोतको भनाइ छ । उनको सम्बन्धमा फाल्गुन ५ गते जिल्ला अदालत सुनसरीले पेसी तोकेको छ ।
