भण्टावारी । “सफा राखौं,स्वस्थ बनौं” भन्ने नाराका साथ सुनसरीको भण्टावारी बजारमा सरोकारवालाहरुले सरसफाई गरेका छन् । सामुदायिक प्रहरी साझेदारी कार्यक्रम अन्तर्गत कोशी गाउँपालीका वार्ड नम्बर ८ भण्टावारीमा आयोजित सरसफाई कार्यक्रममा सरोकारवालाहरुले आइतबार बिहान भण्टावारी बजारमा सरसफाई गरेका हुन ।वार्ड कार्यालय हुँदै भण्टावारी बजार क्षेत्रमा झाडुले फोहोर संकलन गरेर सरोकारवालाहरुले सरसफाइ गरेका थिए । समापन कार्यक्रममा स्थानीयहरुले कोशी गाउँपालीका खुला दिशा मुक्त क्षेत्र घोषणा भएपनि अहिले पनि ५० प्रतिशत बढी जनता खुला दिशापिसाब गर्ने गरेको ध्यानाकर्षण गराएको थियो ।
खुला ठाँउमा दिशापिसाब गर्नाले वातावरण प्रदुषित हुने भएको बताउदै कार्यक्रमका सहभागीहरुले खुला ठाँउमा दिशापिसाब नगर्न आग्रह गरेका थिए । सोही कार्यक्रममा बोल्दै बिओपी भण्टावारीका सशस्त्र प्रहरी निरीक्षक मनोज खनालले स्वास्थ्यको लागि सरसफाइ अनिवार्य भएकोले आ आफ्नो स्थानबाट स्वच्छ वातावरण बनाउनका लागि योगदान दिन आग्रह गरेका थिए । यस्तै ८ नम्बर वार्डका अध्यक्ष बलराम क्षेत्री बजार सरसफाइ अभियानलाई आगामी दिनमा समेत निरन्तर दिइने बताए । सरसफाइ कार्यक्रममा इलाका प्रहरी कार्यालय भण्टाबारीका इन्चार्ज सई शेरबहादुर पराजुली,अस्थायी ट्राफिक प्रहरी कार्यालय भण्टाबारीका इन्चार्ज भुवन विक,कोसी गाउँकार्यपालीका सदस्य सर्जुग सरदार,उद्योग वाणिज्य संघ कोसीका उपाध्यक्ष चन्दन यादवसहित स्थानीयबासी,जनप्रतिनिधि,सुरक्षाकर्मी
संचारकर्मीको सहभागिता रहेको थियो ।
