इनरुवा । जिल्ला प्रहरी कार्यालय सुनसरीले भारतीय बजारबाट चोरबाटो भई ल्याइएको प्रतिबन्धित भारतीय माछा नियन्त्रणमा लिई नष्ट गरेको छ । बिशेष सूचनाको आधारमा जिल्ला प्रहरी कार्यालय सुनसरी, मातहत इलाका प्रहरी कार्यालय देवानगन्ज र वडा प्रहरी कार्यालय धरानबाट खटिएको छुट्टा-छुट्टै प्रहरी अधिकृतको टोलीहरूले प्रतिबन्धित भारतीय माँगुर माछा नियन्त्रणमा लिई नष्ट गरेको जिल्ला प्रहरी कार्यालय सुनसरीका प्रवक्ता डिएसपी नवीन कृष्ण भण्डारीले जानकारी दिनुभयो ।
इनरूवा नगरपालिका वडा नं. २ सोमबारे हटियाबाट अन्दाजी मूल्य रू. ५२,५०० रुपैयाँ बराबरको १५० के.जी.,धरान उप-महानगरपालिका वडा नं. ३ माछा भौडी स्थितबाट ५० के.जी. अन्दाजी मूल्य रू. १७,५०० रुपैयाँ र देवानगन्ज गाउँपालिका वडा नं. ३ नयाँ हटियाबाट २० के.जी. अन्दाजी मूल्य रू. ७००० रुपैयाँ बराबरको सो माछा कानून बमोजिम बरामद गरी स्थानिय पशु क्वारेनटाईन कार्यालयबाट खटिएका प्रतिनिधी, जनप्रतिनिधीहरू समेतको रोहबरमा नष्ट गरिएको उहाँको भनाइ छ । जिल्लाभर शान्तिसुरक्षा कायम गरी सीमावर्ती क्षेत्रमा हुँदै आएको चोरीपैठारी नियन्त्रणमा लिन सुनसरी प्रहरी लागिपरेको डिएसपी भण्डारीले बताउनुभयो ।
