जुगेश दास
सुनसरी । देवानगञ्ज गाउँपालिका वडा नम्बर-६ मा आइतबारदेखि अनलाइन दर्ता चलानीको औपचारिक सुरुवात गरिएको छ। यस प्रणालीमार्फत वडा कार्यालयमा दर्ता, निवेदन, र अन्य प्रशासनिक प्रक्रियाहरूलाई डिजिटल माध्यमबाट व्यवस्थित गरिने भएको छ।
वडा अध्यक्ष हरिनन्दन मेहताका अनुसार, अनलाइन प्रणालीले प्रशासनिक कामकाजलाई छिटो, पारदर्शी र प्रभावकारी बनाउन मद्दत गर्नेछ। उनले भने, “हाम्रो उद्देश्य सेवाग्राहीलाई छिटो र सरल सेवा प्रदान गर्नु हो। अब दर्ता र चलानी प्रक्रियामा हुने ढिलासुस्ती हट्नेछ र सेवाग्राहीहरूले आफ्नो कामको स्थिति अनलाइनबाटै हेर्न सक्नेछन्।”
यस प्रणालीले डिजिटल नेपाल अभियानलाई पनि सघाउने अपेक्षा गरिएको छ। वडा कार्यालयका कर्मचारीहरूलाई नयाँ प्रणालीमा तालीम दिइसकिएको र सेवाग्राहीलाई पनि आवश्यक परामर्श उपलब्ध गराउने व्यवस्था मिलाइएको वडा कार्यालयले जनाएको छ।
स्थानीयवासीहरूले अनलाइन प्रणालीको प्रशंसा गर्दै सेवामा थप सुधार आउने विश्वास व्यक्त गरेका छन्। यस कदमलाई डिजिटल युगतर्फ गाउँपालिका नेतृत्वको महत्वपूर्ण प्रयासका रूपमा हेरिएको छ।
