मिकाइल आलम
इनरुवा । जिल्ला प्रहरी कार्यालय सुनसरीले आठ महिनाको अवधिमा सात सय ९४ जना प्रतिवादी पक्राउ गरेको छ । अदालतको फैसला कार्यान्वयनका लामो समयदेखि फरार प्रतिवादी पक्राउ गर्न चलाएको विशेष अभियान अन्तर्गत चालु आर्थिक वर्षमा सात सय ९४ जना प्रतिवादी पक्राउ गर्न सफल भएको जिल्ला प्रहरी कार्यालय सुनसरीका प्रमुख, प्रहरी उपरीक्षक सुमनकुमार तिम्सिनाले बताए । पक्राउ परेका प्रतिवादीहरुबाट एक सय २९ वर्ष सात महिना एक दिन कैद भुक्तान र एक करोड १२ लाख ४७ हजार दुईसय ७८ रुपैयाँ राजस्व तथा जरिबाना असुल उपर गरिएको उनले उल्लेख गरे ।
जिल्ला प्रहरी कार्यालय तथा मातहत रहेका ८६ वटा प्रहरी कार्यालयबाट खटिएका प्रहरी टोलीले जिल्ला अदालतबाट सजाइ पाएर कैद भुक्तान नगरी फरार रहेका विभिन्न स्थानका प्रतिवादी पक्राउ गरिएको हो । फैसला कार्यान्वयन, लागू औषध ओसारपसार तथा भन्सार चोरी निकासी नियन्त्रण र नवप्रवर्द्धनात्मक गरी चार अभियान जिल्ला प्रहरी कार्यालयले चलाएको प्रहरी उपरीक्षक सुमनकुमार तिम्सिनाले जानकारी दिए । फरार प्रतिवादी पक्राउ गर्दै अपराध गरेर भागे पनि कानुनले छाड्दैन भन्ने सन्देश प्रवाह गर्दै नेपाल प्रहरीले अपराध न्यूनिकरणमा आफ्नो कर्तव्य निर्वाह गरेपछि प्रहरीको काम कारबाहीप्रति जनसमुदायको विश्वास बढेको उनको भनाइ छ ।
