इनरुवा । जिल्ला प्रहरी कार्यालय सुनसरीले हालसम्म सनाखत हुन नसकेको व्यक्तिलाई ठक्कर दिई फरार भएका मोटरसाइकल चालकलाई नियन्त्रणमा लिएको छ् । मंसिर १९ गते साँझको समयमा सुनसरी जिल्लाको कोशी गाउँपालीका वडा नं. ३ जमुवा स्थित पूर्व पश्चिम राजमार्ग सडक किनारमा हालसम्म नामथर, वतन नखुलेको अन्दाजी ५०/५५ उमेर पुगेको जस्तो देखिने पुरूष व्यक्तिलाई ठक्कर दिने मोटरसाइकल र चालकलाई नियन्त्रणमा लिएको सुनसरी प्रहरीले जनाएको छ ।
ठक्करबाट सख्त घाईते अबस्थामा फेला पारी प्रहरीले तत्कालै उपचारर्थ जिल्ला अस्पताल ईनरूवा पठाएकोमा घाइतेको उपचारको क्रममा मृत्य भएको थियो । मृतकको नामथर, ठेगाना पहिचानको लागि विभिन्न माध्यमवाट पत्राचार एंव Website मा समेत हुलिया सहितको विवरण राखिएकोमा हालसम्म सनाखत हुन नसकेको जनाइएको छ । जाडोको समयमा सुनसान सडकमा ठक्कर दिई मोटरसाइकल लिएर मोटरसाइकल चालक भाग्न सफल भएकोमा उक्त घटनाको छानवीन, अनुसन्धान गर्न जिल्ला प्रहरी कार्यालय सुनसरीबाट डिएसपी नविन कृष्ण भण्डारीको कमाण्डमा समिति गठन गरिएको थियो ।
गठित समितिले घटनाको बारेमा सुक्ष्म ढंगबाट विभिन्न तौरतरीका अपनाई अनुसन्धान गर्दै जाँदा कोशी गाउँपालीका ४ बस्ने बर्ष ४० का पशुपति खेरवारले चलाएको मोटरसाइकलले ठक्कर दिंदा सनाखत हुन नसकेको व्यक्तिको मृत्यु भएको खुलेको हो । ठक्कर दिने व्यक्तिलाई खोजतलास गर्दै जाँदा कोशी गाउँपालीका ८ मा लुकिछिपी बसेको अवस्थामा ठक्कर दिने प्र. १-०२-०४५ प. ९९२७ नम्बरको मोटरसाइकल सहित कोशी गाउँपालीका वडा नं. ६ श्रीपुरजब्दीमा लुकाई छिपाई राखेको अवस्थामा फेला पारिएको डिएसपी भण्डारीले जानकारी दिए । पक्राउ परेका व्यक्तिमाथि कानुनबमोजिम कारबाही प्रक्रिया अगाडि बढाएको प्रहरीले जनाएको छ ।